गतिमंद अनन्याचं नुकतंच लग्न झालं…
लग्नाचा दिवस उजाडला, आजपर्यंत घेतलेली मेहनत समोर दिसणार होती. अनन्याच्या लग्नाला कोणत्याही नातेवाईकांना बोलवलं नव्हतं असं तिच्या आईने सांगितलं. तिच्या लग्नात आमच्या संपर्कात आणि संस्थेशी जोडल्या गेलेल्या खास ३०० कुटुंबीयांना आमंत्रित केलं होतं. हे कुटुंबीय असे होते, ज्यांची मुलं Down Syndrome अर्थात गतीमंद होती.
अनन्याच्या लग्नात एकाही नातेवाईकाला बोलावलं नव्हतं…
गतीमंद मुलांचे जे पालक आपल्या मुलांची परिस्थिती बघून नेहमी हताश होत होते ते सर्वजण अनन्याच्या लग्नाच्या दिवशी नाचत होते. हा सोहळा पाहून त्यांना नवी ऊर्जा तर मिळाली होती, शिवाय प्रत्येकजण आज पाहिलेला विवाह देव विवाह असल्याचं म्हणत होता असंही त्यांनी सांगितलं.
आज मी जगातला भाग्यवान बाप आहे
अनन्याच्या लग्नाबाबत बोलताना तिचे वडील म्हणाले, बाप म्हणून माझ्या मनाची काय अवस्था होत आहे, ते सांगू शकतं नाही. पण मी जगातला सर्वात भाग्यवान बाप असल्याचं ते म्हणाले. कारण केवळ अनन्यामुळे इतरांवर प्रेम करायचं मला कळलं होतं, असंही अनन्याचे वडील म्हणाले. पुढे बोलताना त्यांनी सांगितलं, की माझ्या आयुष्यात मी कुणाचंही कधीच वाईट केलं नव्हतं, तरीही देवाने मला अनन्यासारखी मुलगी दिली, जी कायम एखाद्या लहान मुलासारखी राहणार आहे. या गोष्टीचं दुःख कायम व्हायचं, पण आज मी देवाचे आभार मानतो की अनन्याचा वडील होण्याचं भाग्य तिने मला दिलं.
या मुलांना फक्त प्रेमाची भाषा कळते…गतीमंद नाही, तर ही स्पेशल मुलं
पुढे ते म्हणाले, तुम्ही तुमच्या आयुष्यात अशी एकही व्यक्ती सांगू शकत नाही, जिने तुम्हाला २० वर्षात कधीच दुखावलं नाही. पण माझ्या आयुष्यातील ती व्यक्ती अनन्या आहे. तिला फक्त प्रेमाची भाषा कळते. ही सगळी मुलं गतिमंद नाही, तर ती स्पेशल चाईल्ड आहेत. त्यांना जगातील द्वेष, राग कळत नाही. ते तुम्हाला कधीच उलट बोलत नाहीत. अशा मुलांसोबत खेळायला हवं, त्यांना फिरायला न्यायला हवं. पण दुर्दैवाने अनेक पालक मुलांना मोबाईल देतात आणि आपल्या नशिबाला दोष देत बसतात.
अनन्या शिक्षिका आहे, तर विघ्नेश एका कंपनीत ५ वर्षांपासून काम करतो
आज अनन्या शिक्षिका आहे, ती मुलांना ट्रेन करते. तर विघ्नेश एका कंपनीत ५ वर्षांपासून काम करतो. तो स्वतःच्या पायावर उभा आहे.
तुम्ही दोघे एकेमकांसाठी कोण आहात? विघ्नेशने तिचा हात पकडला आणि…
अनन्या आणि विघ्नेशला तुम्ही दोघं एकेमकांसाठी कोण आहात? असा प्रश्न विचारला. त्यावेळी दोघेही लाजले. अनन्या ईज माय वाईफ असं म्हणत विघ्नेशने तिचा हात पकडला तो शेवटपर्यंत साथ देण्यासाठीच. अनन्या तर विघ्नेशला आपलं सर्व काही मानून बसली, तो एक सेकंदही दूर गेलेला तिला चालत नाही. पुढे या दोघांचं वैवाहिक आयुष्य कसं असेल? त्यांच्या वेलीवर फुलं बहरतील का? त्यांना एकमेकांची काळजी घेता येईल का? प्रवास कसा करतील, काय खातील असे शेकडो प्रश्न दोघांच्याही आई-वडिलांना आहेत. मात्र सगळ्यांना एकच विश्वास आहे दोघेही कायम एकत्र राहतील. (Photo Credit: Mandar Doulat Bhoir)