नवी मुंबई: मुंबई-पुणे द्रुतगती मार्गावर सोमवारी दुपारी २ वाजताच्या दरम्यान अल्टो कारचा भीषण अपघात झाला आहे. कार चालकाला झोप लागल्यामुळे ही घटना घडल्याचे सांगण्यात येत आहे. या अपघातात दोघे जण गंभीर तर एक जण किरकोळ जखमी झाला आहे. अल्टो कारमध्ये लोखंडी रेलिंग घुसली असून त्यामुळेच अपघाताची तीव्रता वाढली आहे.
मिळालेल्या माहितीनुसार, अल्टो कार (एमएच०३/बीइ६२२८) चालक कविराज मुसलोनकर (४५) हे मुंबई बाजूकडे पहिल्या लेनवरून जात असताना त्यांना डुलकी लागल्याने त्यांचा कारवरील ताबा सुटला. त्यानंतर कार पहिल्या लेनचे उजव्या बाजूच्या रेलिंगला ठोकरली. यावेळी लोखंडी रेलिंग गाडीच्या समोरील काचेतून पाठीमागील बाजूस आरपार बाहेर पडले. या अपघातामध्ये कारचालक मुसलोनकर आणि कारमधील सोनम जवळकर (४०) यांना गंभीर दुखापत झाली आहे.
तसेच देविन मुसलोनकर (१४) हिला किरकोळ दुखापत झाली आहे. हा अपघात खालापूर पोलीस ठाण्याच्या हद्दीत घडला असून अपघातग्रस्त जखमींना आयआरबी अॅम्बुलेंसने कामोठेतील एमजीएम हॉस्पिटल येथे उपचारासाठी नेण्यात आले. तसेच अपघातग्रस्त वाहन आयआरबी क्रेनच्या मदतीने रोडच्या बाजूला करून वाहतूक सुरळीत चालू करण्यात आली होती.