किरकोळ बाजारात टॉमेटो दीडशेपार
काही महिन्यांपूर्वी टॉमेटोची कवडीमोल दराने विक्री होत होती. टॉमेटो शेतकऱ्यांचा उत्पादनासाठी केलेला खर्चदेखील निघत नव्हता. टॉमटोची कवडीमोल दराने विक्री होत असल्याने शेतकरी हताश झाले होते. त्यामुळे या टॉमेटो उत्पादक शेतकऱ्यांनी नवीन लागवड, उत्पादन घेण्याकडे दुर्लक्ष केले. त्यामुळे सध्या टॉमेटोचे उत्पादन कमी झाले असून बाजारपेठेतील आवक रोडावली आहे.
एक किलो टॉमेटो १६० रुपयांना
बाजारपेठेत टॉमेटोची आवक कमी झाल्याने साहजिकच घाऊक आणि किरकोळ बाजारपेठेतील दर झपाट्याने वाढले आहेत. किरकोळ बाजारपेठेत सध्याच्या घडीला १६० रुपये प्रतिकिलो दराने टॉमेटोची विक्री होत आहे. टॉमेटोची किंमत आवाक्याबाहेर गेल्याने सर्वसामान्यांच्या स्वयंपाकघरातून टॉमेटो गायब झाले आहेत. टॉमेटोचे दर सातत्याने वाढत असल्याने सर्वसामान्यांच्या चिंतेत भर पडली आहे. सध्या आठवडाभर तरी त्याचे दर कमी होण्याची शक्यता नाही. टोमॅटोशिवाय कोबी, फ्लॉवर, काकडी, पालेभाज्या आदी भाज्याही महागण्याची शक्यता आहे.
देशभरात टॉमेटोचे दर कडाडले
देशातील अन्य राज्यांमध्येही टॉमेटोचे दर कडाडले आहेत. अनेक राज्यांमध्ये टोमॅटो २०० रुपये किलोपर्यंत विकला जात आहे. हिमाचल प्रदेशात सुरू असलेल्या मुसळधार पावसामुळे पिकांची काढणी आणि पुरवठा विस्कळीत होत झाला असून टोमॅटोची काढणी थांबली आहे. यासोबतच वाहतुकीच्याही मोठ्या समस्यांना सामोरे जावे लागत आहे. हिमाचल प्रदेश आणि महाराष्ट्रातून टोमॅटो आणि इतर भाज्यांचा पुरवठा होतो. हिमाचल प्रदेशातील मुसळधार पावसामुळे टोमॅटो, कोबी, फ्लॉवर आणि शिमला मिरचीचे बहुतेक उभे पीक नष्ट झाली आहेत. पाणी साचल्यामुळे पीक खराब झाले आहेत. त्यामुळे या भाज्यांच्या पुरवठ्यावर परिणाम होऊ शकतो.
टॉमेटोच्या दराचं गणित कसं बिघडलं?
मे महिन्याच्या पहिल्या आठवड्यात महामुंबई परिसरात टोमॅटोची किंमत १५ रुपये प्रति किलोवरून विविध क्षेत्रांमध्ये १२० ते १५० रुपये प्रति किलोपर्यंत वाढली आहे. दरवर्षी मे-जूनदरम्यान टोमॅटोचे दर चढे असतात. याचा फायदा घेण्यासाठी देशभरातील शेतकरी टोमॅटोची लागवड करतात, मात्र यंदाच्या मे महिन्यात शेतकऱ्यांना एक ते पाच रुपये किलो दराने टोमॅटो विकावे लागले. अनेक ठिकाणी कवडीमोल दर मिळाल्याने शेतकऱ्यांनी उद्विग्न होऊन टॉमेटो रस्त्यावर फेकून दिले होते. नंतरच्या काळात शेतकऱ्यांनी टॉमेटोचे उत्पादन घेणे टाळले. उत्पादन मंदावल्याने साहजिक बाजारपेठेतील टॉमेटोची आवक मंदावत गेली आणि टॉमेटोचे दर टप्याटप्याने वाढत गेले.
टॉमेटोचे दर कधी कमी होणार?
दीडशे रुपयांवर गेलेला टोमॅटो आवाक्यात येण्यासाठी ऑगस्टअखेरची वाट पहावी लागणार आहे. जूनच्या पहिल्या आठवडय़ात टोमॅटोचे भाव वाढत असल्याचे शेतकऱ्यांच्या लक्षात आले. त्यानंतर साधारण १५ जूननंतर शेतकऱ्यांनी टोमॅटोची लागवड केली. हा टोमॅटो बाजारात येण्यास २० ऑगस्ट उजाडेल. त्यामुळे सर्वसामान्यांच्या आवाक्यात टोमॅटो येण्यासाठी ऑगस्टअखेरची वाट पहावी लागणार आहे.