शेतकऱ्यांच्या हातातोंडाशी आलेला घास आस्मानी संकटाने हिरावून घेतला होता. त्यामुळे मागील दोन ते तीन महिन्यांपासून प्रति क्विंटल अडीच हजार रुपयांपर्यंत गेलेले केळीचे दर ५०० ते ६०० रुपयांवर आले होते. भाव घसरल्याने केळी उत्पादक शेतकरी मोठ्या आर्थिक संकटात सापडले होते. आता केळीला २२०० रूपये प्रति क्विंटल भाव मिळत आहे. केळीचे दर पूर्ववत होत असल्याने शेतकऱ्यांना दिलासा मिळत आहे. अर्धापूर तालुक्यातील केळी प्रसिद्ध आहे. देश विदेशा पर्यंत अर्धापूरच्या केळीला मागणी असते.

दरवर्षी आखाती देशात केळीची निर्यात केली जाते. इराण, इराक, दुबई यासह इतर देशात केळी पाठवली जातात. गतवर्षी पाकिस्तानला केळीची निर्यात करण्यात आली होती. मात्र अवकाळी पावसामुळे केळीचे मोठे नुकसान झाल्याने देश विदेशातील निर्यात प्रक्रिया थांबली होती. आता पुन्हा इराक, इराणसह अन्य देशात केळी निर्यात करण्यात आली आहे. मागील तीन ते चार महिन्यांपासून केळीचे दर घसरले होते. आता पुन्हा दर वाढण्यास सुरूवात झाली आहे. पुढील काही दिवस सण उत्सवाला सुरुवात होणार असल्याने केळीची मागणी वाढणार आहे. त्यामुळे केळीचे दरही ३००० रुपये प्रति क्विंटल पर्यंत जातील, असे व्यापाऱ्यांकडून सांगण्यात येत आहे.