बहादूरशेख -चिपळूण येथे आले असता त्यांना काही प्रवाशांनी हात दाखविला. त्यानंतर त्यांनी गाडी तिथे उभी केली. यावेळी तिन्ही प्रवाशांनी त्यांच्याकडे आम्हाला इस्लामपूरला सोडा, अशी विनंती केली. परंतु आपण तिकडे जाणार नाही, असे सुवासे यांनी सांगितले. त्यानंतर आपण आम्हाला हायवेला तरी सोडा, अशी गळ त्यांनी घातली. विनंती केल्यानंतर सुवासे यांनी पतीपत्नी आणि वृद्ध सुरेश लक्ष्मण कांबळे (७०) यांना कारमध्ये घेतले. कार पोफळी येथील लिला हॉटेलच्या पुढे साधारण दोन कि.मी. अंतरावर आली. मात्र महामार्गावर पावसामुळे धुक्याचे वातावरण होते. कार घाट चढत असताना अचानक एक गाय कारच्या समोर आल्याने चालक सुवासे यांनी कार उजव्या बाजूला घेतली. यादरम्यान कार अचानक उलटली आणि रस्त्याच्या खाली जाऊन शेतात अडकली.

या अपघातात वृद्ध सुरेश लक्ष्मण कांबळे यांचा मृत्यू झाला तर अन्य तिघे वाचले आहेत. अपघात झाल्यानंतर चालक सुवासे आणि पतीपत्नीला सुखरूप बाहेर काढण्यात आले. चालक सुवासे हे मयत सुरेश कांबळे यांना बाहेर काढत असताना ते प्रवासी पतीपत्नी तेथून निघून गेले. परंतु त्यांचा मोबाईल कारमध्येच पडल्याचे समजले आहे. अपघातात कारचे सुमारे अडीच ते तीन लाखांचे नुकसान झाले आहे. या अपघातानंतर चिपळूण पोलीस ठाण्यात कार चालक बाबासाहेब सुवासे यांनी फिर्याद दिली. हा अपघात अलोरे-शिरगाव पोलीस ठाण्याच्या हद्दीत झाल्याने तेथे गुन्हा दाखल करण्यात येणार आहे.