लोणावळा : मुंबई-पुणे एक्स्प्रेस वेवर लोणावळ्याजवळ ओव्हर ब्रीजवर ऑइल टँकरचा अपघात होऊन भीषण आग लागल्याची घटना समोर आली आहे. यामुळे ब्रीज खाली देखील अपघात घडल्याची माहिती समोर येत आहे. ही आग लगल्याने बचावकार्य युद्धपातळीवर सुरू असून सध्या वाहतूक लोणावळा शहरातून वळवली जात आहे. एक्स्प्रेस वेवर मोठी वाहतूक कोंडी होऊ शकते, त्यामुळे बचावकार्य वेगाने पूर्ण करण्याचा प्रयत्न केला जात आहे.मिळालेल्या माहितीनुसार, पुणे-मुंबई महामार्गावर खंडाळा घाटातील कुणे पुलावर भीषण अपघात झाला आहे. केमिकलची वाहतूक करणारा टँकर पलटी होऊन मोठा अपघात झाला तोच टँकरने पेट घेतला. या अपघातामुळे टँकरमधील केमिकल रस्त्यावर सांडलं आणि मोठी वाहतूक कोंडी झाल्याचं पाहायला मिळालं. सगळ्यात धक्कादायक बाब म्हणजे रस्त्यावर केमिकल सांडल्याने एक दुचाकीस्वार यावरून घसरला.
यामध्ये दुचाकीवरील १२ वर्षांचा मुलगा होरपळून ठार झाला तर त्याचे आई-वडील गंभीर जखमी झाले आहेत. या दुर्घटनेनंतर पुण्याकडून मुंबईकडे जाणारी वाहतूक ठप्प झाली आहे. तर दुर्घटनेत टँकर चालकही गंभीर जखमी झाला असल्याची माहिती आहे. या घटनेचे फोटोही सध्या समोर आले आहेत. तर पोलीस आणि मदतकार्य घटनास्थळी दाखल झाल्याची माहिती आहे. प्राथमिक माहितीनुसार, या अपघातामध्ये आतापर्यंंत एकूण ३ ठार आणि ३ गंभीर जखमी असल्याची माहिती आहे.