पुणे : कडक उन्हात सांगलीकडे निघालेली एक बस रस्त्यात अचानक बंद पडली. एकीकडे रखरखतं ऊन आणि दुसरीकडे रस्त्यावर जवळपास कुठेही एखादं झाडही नसल्याने प्रवाशांची अवस्था बिकट झाली. अशा उन्हाच्या काहिलीत रस्त्यावर उभ्या असलेल्या प्रवाशांच्या मदतीला खासदार सुप्रिया सुळे धावून आल्या. दौऱ्यानिमित्त भोरच्या दिशेने निघालेल्या खासदार सुळे यांनी स्वतःच्या गाडीसह कार्यकर्ते आणि अन्य वाहनांसह मागून आलेल्या एसटी बसमधून सर्व प्रवाशांना खेड-शिवापूर टोल नाका आणि अन्य सावली असलेल्या ठिकाणी पोहोचवले.याबाबतची सविस्तर माहिती अशी की, दुपारी तीन ते साडेतीन वाजताच्या दरम्यान सातारा रस्त्यावर शिंदेवाडी परिसरात पुण्याहून सांगलीकडे निघालेली शिवशाही बस बंद पडली होती. सदर बसमधील सर्व प्रवासी महिला, मुले आणि ज्येष्ठ नागरिक सुद्धा उन्हाच्या काहिलीने हैराण होत बसजवळ उभे होते. भोर तालुका दौऱ्यावर निघालेल्या खासदार सुप्रिया सुळे यांचा ताफा त्याठिकाणी पोहोचला, त्यावेळी रस्त्यावर उभ्या प्रवाशांना पाहून सुळे यांनी गाड्या थांबवण्याची सूचना केली आणि स्वतः गाडीतून उतरून प्रवाशांची विचारपूस केली.
Pune Police: मुलाची लग्नपत्रिका वाटण्यासाठी API बापाची धावपळ; पण क्षणात सगळं संपलं; पुणे जिल्हा हळहळला!गाडी बंद पडल्याने ते सर्वजण थांबल्याचे कळताच सुप्रिया सुळे यांनी तातडीने हालचाल करत काही प्रवाशांना स्वतःच्या गाडीत घेतले, काहींना कार्यकर्त्यांच्या गाडीत बसवून घेण्याच्या सूचना दिल्या. मागून काही एसटी गाड्या सातारा रस्त्यावर धावत होत्या, त्यांना थांबण्याची विनंती केली. त्यापैकी सांगली जिल्ह्यातील पेठ येथे निघालेल्या एसटीचे चालक एस. एस. कदम आणि वाहक आर. व्ही. सोनवणे यांनी सुळे यांच्या आवाहनाला प्रतिसाद देत गाडी थांबवली आणि काही प्रवाशांना आपल्या बसमध्ये बसवून घेतले. अशा रीतीने सर्व प्रवाशांना खेड शिवापूर टोल नाका परिसरात सावली असलेल्या ठिकाणी हलवले.
उन्हाने हैराण झालेल्या त्या प्रवाशांसाठी सुप्रिया सुळे यांनी पाण्याची व्यवस्था करायला लावली. मागे आणखी काही प्रवाशी राहिले असतील तर त्यांना पण घेऊन येण्याबाबत आपल्या सोबतच्या पोलीस कर्मचारी आणि कार्यकर्त्यांना सूचना दिल्या. सर्व प्रवाशांची संपूर्ण सुविधा झाली असून सर्वजण सुखरूप सावलीत पोहोचले आहेत, याची खात्री करूनच खासदार सुळे पुढे रवाना झाल्या. त्यानंतर काही वेळाने बंद पडलेली शिवशाही बस दुरुस्त होऊन पुढे आल्यानंतर त्यामध्ये बसून सर्व प्रवाशी पुढील प्रवासासाठी रवाना झाले.
दरम्यान, दूरच्या प्रवासाला सोडण्यात येणारी प्रत्येक एसटी बस महामंडळाने तपासूनच पाठवायला हवी, अशी अपेक्षा यावेळी सुप्रिया सुळे यांनी व्यक्त केली. महामंडळाच्या गाड्या अचानक नादुरुस्त होण्याचे प्रमाण देखील वाढले असल्याचे प्रवासी सांगतात. राज्याच्या परिवहन मंत्र्यांनी याकडे वैयक्तिक लक्ष घालून प्रवाशांना नाहक त्रास होणार नाही याची काळजी घेतली पाहिजे, असे त्या म्हणाल्या.