जुन्या पुणे मुंबई महामार्गावर बस दरीत कोसळली, बोरघाटात भीषण अपघात, मृतांचा आकडा १३ वर

या अपघाताची माहिती मिळताच स्थानिक हायकर्स ग्रुप, आयआरबीचे पथक आणि पोलीस घटनास्थळी दाखल झाले. या सगळ्यांनी तातडीने बचावकार्य सुरु केले. बस जवळपास १५० फूट खोल दरीत कोसळल्यामुळे त्याठिकाणी थेट जाणे शक्य नाही. दोरखंडांच्या मदतीने ट्रेकर्स, अग्निशमन दलाचे जवान खाली उतरून बसमधील जखमी प्रवाशांना एक-एक करुन वर आणत आहेत. त्यानंतर रुग्णवाहिकेत टाकून या सर्वांना पुढील उपचारासाठी रवाना केले जात आहे. या बसमध्ये एकूण ४५ प्रवाशी असल्याची माहिती आहे. आतापर्यंत हाती आलेल्या माहितीनुसार, या दुर्घटनेत १३ जणांचा मृत्यू झाला आहे. तर आणखी काही जणांची प्रकृती गंभीर असल्यामुळे मृतांचा आकडा वाढण्याची शक्यता आहे. मृतांमध्ये पाच लहान मुलांचा समावेश असल्याचेही सांगितले जात आहे. जखमींना प्रथम खोपोली नगरपालिकेच्या रुग्णालयात नेले जात आहे. गंभीर प्रकृती असलेल्यांना पुढील उपचारासाठी नवी मुंबईच्या एमजीएम रुग्णालयात पाठवले जात आहे.

स्ट्रेचर दोरखंडाला बांधून प्रवाशांना बाहेर काढले

ही दुर्घटना झाल्याचे समजताच स्थानिक ट्रेकर्स, हायकर्स ग्रूप हे तातडीने मदतीला धावून आले. बस ही खोल दरीत असल्यामुळे तिथपर्यंत रुग्णवाहिका किंवा इतर कोणतेही वाहन पोहोचणे शक्य नाही. त्यामुळे हायकर्स ग्रूपचे सदस्य हे दोरखंडांना स्ट्रेचर्स बांधून जखमी अवस्थेतील प्रवाशांना दरीतून बाहेर काढत आहेत. प्रत्येक प्रवाशाला बाहेर काढण्यासाठी साधारण २५ ते ३० मिनिटांचा वेळ लागत आहे.