मुंबई: काही दिवसांपूर्वी मुंबईच्या सांताक्रुझ परिसरातील उद्योगपती कमलाकांत शहा आणि त्यांच्या आईच्या हत्याप्रकरणामुळे शहरात एकच खळबळ उडाली होती. कमलाकांत शहा यांची पत्नी काजल शहा आणि तिचा प्रियकर या हत्येमागील सूत्रधार असल्याची माहिती समोर आली होती. काजल शहा हिने आपल्या पतीला आणि सासूला जेवणातून थोडं-थोडं विष देऊन संपवल्याचा धक्कादायक प्रकार तपासादरम्यान समोर आला होता. या प्रकरणाची सध्या न्यायालयात सुनावणी सुरु आहे. या पार्श्वभूमीवर मुंबई गुन्हे शाखेने (Crime Branch) या प्रकरणाच्या न्यायालयीन सुनावणीसाठी सरकारने विशेष सरकारी वकील नेमावा, अशी मागणी केली आहे.
मुंबई गुन्हे शाखेने गेल्या महिन्यात काजल उर्फ कविता शहा आणि हितेश जैन यांच्याविरोधात न्यायालयात १३५० पानांचे आरोपपत्र सादर केले होते. यामध्ये काजल शहा आणि हितेश जैन या दोघांनी कमलाकांत शहा आणि त्यांच्या आई सरला शहा यांना थॅलियम व आर्सेनिक या दोन्ही विषांची थोडी थोडी मात्रा देऊन पद्धतशीरपणे संपवल्याचे नमूद करण्यात आले होते. काजल आणि हितेश यांनी कमलाकांत यांची संपत्ती हडपण्यासाठी मायलेकांना संपवल्याचा निष्कर्ष तपासादरम्यान काढण्यात आला होता.
मुंबई गुन्हे शाखेने गेल्या महिन्यात काजल उर्फ कविता शहा आणि हितेश जैन यांच्याविरोधात न्यायालयात १३५० पानांचे आरोपपत्र सादर केले होते. यामध्ये काजल शहा आणि हितेश जैन या दोघांनी कमलाकांत शहा आणि त्यांच्या आई सरला शहा यांना थॅलियम व आर्सेनिक या दोन्ही विषांची थोडी थोडी मात्रा देऊन पद्धतशीरपणे संपवल्याचे नमूद करण्यात आले होते. काजल आणि हितेश यांनी कमलाकांत यांची संपत्ती हडपण्यासाठी मायलेकांना संपवल्याचा निष्कर्ष तपासादरम्यान काढण्यात आला होता.
या संपूर्ण प्रकरणाचा तपास हा रंजक आणि चक्रावून टाकणाऱ्या घटनांनी भरलेला होता. कमलाकांत शहा यांच्या मृत्यू संशयास्पद वाटल्यामुळे पोलिसांकडून वैद्यकीय चाचणी करण्यात आली होती. या चाचणीचा अहवाल अत्यंत धक्कादायक होता. कमलाकांत शहा आणि त्यांची आई सरला यांना काही महिने विष देऊन संपवण्यात आल्याचे अहवालातून समोर आले होते. सरला शहा यांचा मृत्यू १३ ऑगस्ट २०२२ रोजी झाला. त्यानंतर काही दिवसांमध्येच १९ सप्टेंबर २०२२ रोजी कमलकांत शहा यांचाही अवयव निकामी झाल्यामुळे मृत्यू झाला होता. त्यांनाही ऑगस्ट महिन्यातच उलट्या आणि पोटात दुखत असल्याने रुग्णालयात दाखल करण्यात आले होते. परंतु, उपचारादरम्यान त्यांचा मृत्यू झाला होता.
Crime Diary: रोज थोडं-थोडं करून पतीला जीव घेतला, पुरावाही नाही ठेवला; वाचा सायलंट किलर ‘सौ’ची कहाणी…
काजलने आपल्या प्रियकराच्या मदतीने या दोघांनाही जेवणातून थॅलियम आणि आर्सेनिक हे विष दिल्याचे समोर आले होते. काजल महिनाभर आपला नवरा आणि सासूला रोज थोडं-थोडं विष देत राहिली. त्यामुळे दोघांच्याही शरीरातील अवयव निकामी होऊन त्यांचा मृत्यू झाला. सरला शहा यांचा मृत्यू नैसर्गिक वाटला, त्यामुळे कोणालाही संशय आला नव्हता. परंतु, कमलाकांत शहा यांच्यावर रुग्णालयात उपचार सुरु असताना करण्यात आलेल्या ब्लड टेस्टमुळे खुनाचा कट उघड झाला होता. कमलाकांत शहा यांच्या रक्तामध्ये थॅलियम आणि आर्सेनिक विषाचे घटक आढळून आले होते. त्यानंतर शहा यांच्या कुटुंबीयांनी पोलीस ठाण्यात तक्रार नोंदवली होती. यानंतरच्या तपासात काजल शहा आणि हितेश जैन यांचा कट उघड झाला होता.
गेल्याच आठवड्यात हे प्रकरण सत्र न्यायालयाकडे वर्ग करण्यात आले होते. न्यायालयाने हितेश जैन आणि काजल शहा यांना १३ एप्रिलपर्यंत सुनावणीसाठी हजर करण्याचे आदेश दिले आहेत. या सुनावणीवेळी पोलिसांनी सर्व कागदपत्रे, जप्त केलेल्या वस्तू आणि पुरावे सादर करण्याचे निर्देशही न्यायालयाने दिले होते. या प्रकरणातील तांत्रिक गोष्टी आणि गुंतागुंत पाहता गुन्हे शाखेने विशेष सरकारी वकिलांची नेमणूक करावी, अशी मागणी केली आहे. सरला शहा यांचा मृत्यू हा हत्येचा प्रकार असल्याचे सिद्ध करणे आव्हानात्मक आहे. सर्व गोष्टी या परिस्थितीजन्य पुराव्यांवर अवलंबून आहेत. याशिवाय, फॉरेन्सिक अहवालानुसार कमलाकांत शहा आणि त्यांच्या आईच्या शरीरात घातक विषारी घटक आढळून आले होते. याआधारेच पोलिसांना काजल शहा आणि हितेश जैन यांचा गुन्हा सिद्ध करता येऊ शकतो.