परभणी: भांडण सोडवण्यासाठी गेलेल्या एका २२ वर्षीय युवकावर आपला पाय गमवण्याची वेळ आली आहे. मोठ्या भावाच्या सासरच्या मंडळींनी चाकूने केलेल्या जीवघेण्या हल्ल्यात युवक गंभीर जखमी झाला. उपचारादरम्यान युवकाचा डावा पाय मांडीपासून कापावा लागला आहे. ही घटना २५ मार्च रोजी दुपारी अडीच वाजेच्या सुमारास परभणी शहरातील भीम नगरात घडली. हैदराबादी येथे उपचार सुरू असताना युवकाने दिलेल्या तक्रारीवरून कोतवाली पोलीस ठाण्यात आरोपींवर गुन्हा दाखल करण्यात आला आहे. काजी फैसल वहीदोद्दिन असे पाय गमावलेल्या युवकाचे नाव आहे.परभणी शहरात राहणारा युवक काजी फैसल वहीदोद्दिन २५ मार्च रोजी दुपारी अडीचच्या सुमारास नातेवाईकांसोबत मोठ्या भावाची पत्नी हिला समजावून सांगून घरी नांदायला आणण्यासाठी भीम नगर येथे गेला होता. यावेळी नातेवाईकांची बोलणी सुरू असताना बोलण्यावरून वाद झाला. त्यामुळे भावाच्या सासरच्या मंडळींनी मारहाण करण्यास सुरुवात केली. एका आरोपीने फैसलचे दोन्ही हात पकडले तर दुसऱ्याने चाकूने मांडीवर गंभीर दुखापत केली.
विनामस्तक धड आढळल्याने नाशिकमध्ये खळबळ; तीन वर्षीय बालिकेचे धड असल्याचा प्राथमिक अंदाज
जखमी फैसलला परभणी येथील शासकीय रुग्णालयात दाखल करण्यात आले. मात्र पायाला गंभीर दुखापत असल्याने वैद्यकीय अधिकाऱ्यांनी प्राथमिक उपचार करून परभणी येथून पुढील उपचारासाठी नांदेडला पाठवले. नांदेड येथे काही दिवस उपचार घेतल्यानंतर देखील पाय बरा होत नसल्याने अखेर फैजलला पुढील उपचारासाठी हैदराबाद येथे हलवण्यात आले. हैदराबाद येथे उपचार सुरू असताना फैसलचा डावा पाय मांडीपासून वेगळा करावा लागला आहे. उपचारादरम्यान दिलेल्या तक्रारीवरुन मतीन शेख, अलताफ शेख आणि इतर दोन महिलांवर कोतवाली पोलीस ठाण्यात गुन्हा दाखल करण्यात आला आहे. सपोनि गुलाब बाचेवाड तपास करत आहेत.
पुणेः महिन्याला चांगला परतावा मिळेल सांगत ९९ लाख भरायला लावले, मात्र प्रत्यक्षात घडलं भलतंच
ठाकरे गटाच्या महिला पदाधिकाऱ्याला मारहाण, शिवसेना महिला कार्यकर्त्यांवर आरोप
