संभाजीनगरच्या वैजापूर तालुक्यातील झोलेगावच्या जांबरखेडा फाट्यानजीक एका शेतात विहिरीचं काम सुरु होतं. तिथे परप्रांतिय मजुरांसह स्थानिक लोक देखील काम करत होते. परंतु विहिरीचं काम सुरु असताना आज दुपारच्या सुमारास अचानक विहीरचा काही भाग ढासळल्याने खाली विहिरीत काम करणारे मजूर मातीच्या ढिगाऱ्याखाली दबले. पाच मजुरांपैकी दोघांना सुखरुपपणे बाहेर काढण्यात आलंय तर तीन जणांना बाहेर काढण्यासाठी बचाव पथक प्रयत्नांची शर्थ करत आहे.

दरम्यान, घटनेची तीव्रता लक्षात घेऊन जशीही अपघाताची माहिती मिळाली तसे वैजापूर पोलिस स्थानकाचे पोलीस यांच्यासह महसूल विभागाचे अधिकारीही घटनास्थळी दाखल झाले आहेत. पोलिसांसह बचाव पथक युद्धपातळीवर मातीत दबलेल्या मजुरांना बाहेर काढण्यासाठी प्रयत्न करत आहे. जखमी दोन मजुरांना प्राथमिक उपचारांसाठी रुग्णालयात देखील दाखल करण्यात आलं आहे. वैजापूर पोलीस पुढील तपास करत आहेत.