छत्रपती संभाजीनगर : छत्रपती संभाजीनगर शहरातील किराडपुरा भागात असलेल्या राम मंदिराच्या बाहेर बेभान झालेला जमाव दगडफेक करत रस्त्यावरील वाहनांची जाळपोळ करत होता, गाड्यांची तोडफोड सुरु होती, वातावरण पूर्णपणे तणावपूर्ण असताना एमआयएम खासदार इम्तियाज जलील यांनी उग्र झालेल्या जमावातून मार्ग काढत राम मंदिराच्या आतमध्ये प्रवेश केला. तिथे जाऊन मंदिर कर्मचाऱ्यांच्या सोबत बसून व्हिडिओच्या माध्यमातून सर्वांना शांतता राखण्याचं आवाहन केलं. हा व्हिडिओ सध्या सोशल मीडियावर व्हायरल होत आहे.
एमआयएम खासदार इम्तियाज जलील नेमकं काय म्हणाले?
मी किराडपुऱ्यातील राम मंदिरात उभा आहे. तुम्ही पाहू शकता, इथे काहीही गडबड नाही. बाहेर तणावाचं वातावरण निर्माण झालं आहे, मात्र मंदिरात मी स्वतः उभा आहे, इथे अनुचित प्रकार घडल्याच्या अफवा पसरवत असतील, तर त्याकडे दुर्लक्ष करा. मी स्वतः जातीने मंदिराच्या आत उभा आहे. बाहेर काही गाड्यांचं नुकसान करण्यात आलं आहे. मात्र मी हात जोडून सर्व लोकांना विनंती करु इच्छितो की कृपा करुन शांतता राखा. राम मंदिरात कुठल्याही प्रकारची चुकीची गोष्ट घडणार नाही, याची काळजी मी स्वतः घेत आहे, असं इम्तियाज जलील म्हणाले.
काय आहे प्रकरण?
दोन गटात झालेल्या किरकोळ वादानंतर छत्रपती संभाजीनगर शहरातील किराडपुरा भागात मोठा राडा झाला होता. समाजकंटकांनी पोलिसांची ८ ते १० वाहने जाळली. यावेळी जमावाला पांगविण्यासाठी पोलिसांनी अश्रूधुराच्या नळकांड्या फोडाव्या लागल्या. ही घटना काल मध्यरात्रीच्या सुमारास घडली होती. मात्र पोलिसांनी अधिक कुमक मागवत परिस्थिती नियंत्रणात आणल्यामुळे आता परिसरात पूर्णपणे शांतता आहे.
छत्रपती संभाजीनगर शहरातील किराडपुरा भागात तरुणांच्या दोन गटात किरकोळ वाद झाला होता. यानंतर जमावाने दगडफेक करण्यास सुरुवात केली. उपस्थित पोलिसांनी जमावाला शांत राहण्याचे वारंवार आवाहन केले तरी जमाव अधिकच हिंसक होत होता. पोलिसांची अधिक कुमक येईपर्यंत जमावाने परिसरात उभ्या असलेल्या वाहनांचीही जाळपोळ सुरु केली होती.
घटनेची माहिती मिळताच मध्यरात्रीच्या सुमारास मंत्री अतुल सावे, खासदार इम्तियाज जलील, आमदार प्रदीप जैस्वाल यांच्यासह विविध राजकीय पक्षांच्या नेत्यांनी घटनास्थळी धाव घेत जमावाला शांतता राखण्याचे आवाहन केले.
अशी वेळ कुठल्याही माऊलीवर नको; बाईकवरच तरुणाचा हार्ट अटॅकने मृत्यू, आईच्या कुशीत अंग टाकलं