म. टा. प्रतिनिधी, पुणे: पुणे-मुंबई द्रुतगती महामार्गासह (एक्स्प्रेस-वे) जुना मुंबई-पुणे महामार्ग, मुंबई-बेंगळुरू महामार्गावरील प्रवास येत्या शनिवारपासून (एक एप्रिल) महागणार आहे. एक्सप्रेस वेवरून जाणाऱ्या कारचालकांना २७० रुपयांऐवजी ३२० रुपये मोजावे लागणार आहेत. तर, सातारा रस्त्यावर लहान वाहनांच्या टोलच्या दरांत १० रुपयांची वाढ झाली आहे.महामार्गांवरील टोलच्या दरांत दरवर्षी सहा टक्क्यांनी, तर पुणे-मुंबई एक्स्प्रेस-वेच्या दरांत दर तीन वर्षांनी १८ टक्क्यांनी वाढ केली जाते. एक्स्प्रेस-वे वरील यापूर्वीचे दर एक एप्रिल २०२० मध्ये बदलण्यात आले होते. त्यामुळे येत्या एक एप्रिलपासून कारचालकांना या रस्त्यावरील प्रवासासाठी आणखी ५० रुपये जादा मोजावे लागतील. एक्स्प्रेस-वेप्रमाणेच राष्ट्रीय महामार्ग प्राधिकरणाकडून पुणे-सातारा रस्त्यावरील आनेवाडी आणि खेड शिवापूर टोलनाक्यांवर दरवाढ करण्यात आली आहे. या दोन्ही ठिकाणी कार ते बससाठी सरासरी १० ते ३० रुपयांची वाढ झाली आहे.
मुंबईकरांसाठी महत्त्वाची बातमी; CSMT रेल्वे स्थानकाला जोडणारा हिमालय पूल आजपासून खुला
द्रुतगती मार्गावर सप्टेंबर २०१९ मध्ये टोलद्वारे एकूण ६० कोटी रुपये जमा झाले होते. जानेवारी २०२३ मध्ये टोलपोटी १०२ कोटी रुपये जमा झाले आहेत. मासिक टोलची रक्कम ७० टक्के वाढली असली, तरीही एक एप्रिलपासून केली जाणारी १८ टक्के दरवाढ अनावश्यक आणि प्रवाशांच्या खिशावर डल्ला मारणारी आहे.– विवेक वेलणकर, सजग नागरिक मंच
एक्सप्रेस वेवरील टोल नाक्यावरील दराची माहिती
| वाहनाचा प्रकार | जुना टोल | नवीन टोल |
| कार | २७० | ३२० |
| बस | ७९७ | ९४० |
| टेम्पो | ४२० | ४९५ |
| ट्रक | ५८० | ६८५ |
| थ्री ॲक्सल | १३८० | १६३० |
| मल्टी ॲक्सल | १८३५ | २१६५ |
सातारा रस्त्यावरील आनेवाडी व खेड शिवापूर टोल दराची माहिती
| वाहनाचा प्रकार | नवीन टोल | जुना टोल |
| कार | १९५ | १८५ |
| मिनी बस | ३१५ | ३०० |
| बस, ट्रक | ६६० | ६३० |
| थ्री ॲक्सल | १०४० | ९९० |
| मल्टी ॲक्सल | १२६० | १२०५ |
