मुंबई, दि. ८ : मे. बॉम्बे हॉस्पिटलमध्ये कार्यरत महिला कर्मचारी व परिचारिका यांच्या विविध समस्या तसेच प्रलंबित मागण्या तातडीने सोडवाव्यात. कंत्राटी कर्मचाऱ्यांच्या सर्व प्रश्नांवर रुग्णालय प्रशासन व कामगार संघटनांनी सामंजस्याची भूमिका घ्यावी, असे निर्देश कामगार राज्यमंत्री ॲड. आशिष जयस्वाल यांनी दिले.

कामगार राज्यमंत्री ॲड. आशिष जयस्वाल यांच्या अध्यक्षतेखाली मे. बॉम्बे हॉस्पिटल संबंधित कर्मचारी, कामगार संघटनेचे प्रतिनिधी तसेच रुग्णालय व्यवस्थापन प्रतिनिधींशी विविध विषयांसंदर्भात बैठक झाली. यावेळी रुग्णालय व्यवस्थापन, विश्वस्त, कामगार संघटनेचे प्रतिनिधी व कर्मचारी उपस्थित होते.

एमओटी विभागामध्ये काही कर्मचाऱ्यांच्या निलंबनाच्या कालावधीचा विचार करून त्यांच्याबाबत कामगार कायद्यानुसार योग्य ती कार्यवाही करावी नियमानुसार त्यांना पुन्हा सेवेत समाविष्ट करण्याबाबत कामगार संघटना आणि रुग्णालय प्रशासनाने परस्पर समन्वयातून सकारात्मक निर्णय घ्यावा, असे निर्देश कामगार राज्यमंत्री ॲड. आशिष जयस्वाल यांनी दिले.

रुग्णालय प्रशासन आणि व्यवस्थापकाने कंत्राटी कर्मचाऱ्यांच्या प्रश्नांचा गांभीर्याने विचार करून सामंजस्याने सर्व समस्यांचे निराकरण करावे. कंत्राटी कर्मचाऱ्यांच्या मागण्यांचा प्रशासनाने सकारात्मक दृष्टिकोनातून विचार करावा. प्रशासन आणि कामगारांनी सुवर्णमध्य साधून आरोग्यसेवेसाठी उत्तम कार्य व पोषक वातावरण निर्माण करावे, असे आवाहन राज्यमंत्री ॲड. आशिष जयस्वाल यांनी केले. रुग्णालयातील आरोग्यसेवा सुरळीत राहण्यासाठी कर्मचारी आणि प्रशासन यांच्यात सकारात्मक संवाद, समन्वय व परस्पर सहकार्य आवश्यक असल्याचेही त्यांनी यावेळी नमूद केले.

000

योगेश मोरे/उपसंपादक