जिल्हा परिषदेच्या मुख्य कार्यकारी अधिकारी, विभागीय आयुक्त कार्यालयाच्या अतिरिक्त विभागीय आयुक्त, राज्य सरकारमध्ये सहसचिव, मुंबई महानगर प्रदेश विकास प्राधिकरणाच्या (एमएमआरडीए) अतिरिक्त महानगर आयुक्त, शालेय शिक्षण व क्रीडा विभागाच्या सचिव, मुख्यमंत्र्यांच्या अपर मुख्य सचिव म्हणून आजवर अश्विनी भिडे यांनी काम पाहिले आहे. मुंबई मेट्रो रेल कॉर्पोरेशनच्या व्यवस्थापकीय संचालक म्हणून त्यांनी मुंबईत मेट्रो रेल्वेचे जाळे निर्माण करण्यात महत्त्वाचे योगदान दिले आहे. भिडे यांनी यापूर्वी महापालिकेत ९ मे २०२० ते १९ मार्च २०२४ या कालावधीत अतिरिक्त महानगरपालिका आयुक्त (पूर्व उपनगरे) या पदावर कार्य केले आहे. मुंबई सागरी किनारी रस्ता (दक्षिण) प्रकल्पाच्या पूर्णत्वामध्येही त्यांचे महत्त्वपूर्ण योगदान राहिले आहे.

पदभार स्वीकारल्यानंतर त्यांनी प्रसारमाध्यमांशी संवाद साधला. ‘मुंबई महापालिकेत हे माझ्यासाठी ‘इनकमिंग’ आहे. दीडशे वर्षांपेक्षा जास्त इतिहास असलेली ही संस्था असून तिची जबाबदारी सांभाळताना नवीन आव्हाने समोर असतील आणि त्यांना सामोरीही जाईन. या शहरासाठी जास्तीत जास्त वेळ देईन आणि जास्तीत जास्त चांगले काम करेन’, अशी ग्वाही भिडे यांनी दिली. ‘या महापालिकेला महिला आयुक्त मिळाली नव्हती, ती संधी राज्य सरकारमार्फत आपणाला मिळाली. मुंबईत पायाभूत सुविधा निर्माण करण्यासाठी नक्की प्रयत्न करेन’, असे सांगतानाच त्यांनी मुंबईतील नालेसफाई कामांवरही भाष्य केले. ‘आगामी पावसाळा ध्यानात घेऊन नालेसफाई कामांचा आढावा घेऊ. यंदा मुंबई तुंबणार नाही, याची नक्की खात्री देते. याआधी असलेल्या कामाचा वेग आताही तसाच राहील’, असेही त्या म्हणाल्या. यापूर्वीही आपण महापालिकेत असताना पावसाळापूर्व कामे वेगाने करण्यावर नेहमीच भर दिला असल्याचेही त्यांनी सांगितले.

Maharashtra Politics: भाजप स्वबळाच्या तयारीत, शिंदेसेनेनंही कंबर कसली; श्रीकांत शिंदेंकडे मोठी जबाबदारी, जम्बो टीम जाहीर
‘मुंबईकरांचे जीवनमान
उंचावण्यासाठी प्रयत्न करू’
पहिल्या महिला आयुक्त म्हणून प्रतिक्रिया विचारता, अश्विनी भिडे म्हणाल्या, ‘महिला म्हणून काही वेगळे असायला हवे असे काही नाही. यापूर्वीही मी मुंबई महापालिकेत अतिरिक्त आयुक्त म्हणून काम केले आहे. मला करोनाकाळातही काम करण्याची संधी मिळाली. आता चार वर्षांनंतर लोकप्रतिनिधी आले असले तरीही यापूर्वी २०२० ते २०२२ या काळात लोकप्रतिनिधी होते आणि मी त्यावेळीही काम केले होते.’ भूषण गगराणी यांनी त्यांची कारकीर्द यशस्वी राबविल्याबद्दल भिडे यांनी त्यांना शुभेच्छा दिल्या. ‘गगराणी हे कोल्हापूरचे आणि मी सांगलीची. त्यांचा आदर्श ठेवून काम करणार’, असेही भिडे यांनी सांगितले.