परभणीतून कल्याणपर्यंतचा प्रवास

या महिलेचा जन्म महाराष्ट्रातील परभणी जिल्ह्यात झाला. त्यांचे स्वप्न होते की त्यांनी पदवीपर्यंत शिक्षण घ्यावे, चांगली नोकरी करावी आणि साधे, सुखी आयुष्य जगावे. मात्र दहावीची परीक्षा झाल्यानंतर कुटुंबाची आर्थिक परिस्थिती इतकी चांगली नव्हती की कॉलेजची फी भरता येईल. याच काळात त्यांच्यासाठी लग्नाचा प्रस्ताव आला आणि कुटुंबीयांनी त्यांचे लग्न लावून दिले.२०१८ मध्ये लग्न झाल्यानंतर त्या पतीसोबत कल्याणमध्ये राहायला आल्या. येथे त्या गृहिणी म्हणून राहात होत्या, तर त्यांचे पती ऑटो रिक्षा चालवत होते. त्याच काळात त्यांच्या पतींनी त्यांनाही ऑटो चालवायला शिकवले.

आयुष्यातील मोठा धक्का

२०२२ साली त्यांच्या घरी ‘तेजू’ या मुलीचा जन्म झाला आणि कुटुंब पूर्ण झाले. मात्र मुलगी अवघी १८ महिन्यांची असताना त्यांचे पती कामानिमित्त परभणीला जात असल्याचे सांगून घराबाहेर पडले आणि त्यानंतर परतच आले नाहीत.

Dombivli News : ‘गॅस बंद होणार’चा मेसेज, लिंकवर क्लिक आणि खातं रिकामं; डोंबिवलीत महिलेला 3 लाखांचा फटका

काळ पुढे सरकत गेला आणि त्या आपल्या छोट्या मुलीसोबत पूर्णपणे एकट्या पडल्या. घर चालवण्यासाठी त्यांनी नोकरी शोधण्यास सुरुवात केली. त्यांना सिक्युरिटी गार्डची नोकरीही मिळाली; मात्र मुलीची काळजी घेण्यासाठी कोणीच नसल्याने ती नोकरी करणे कठीण होत होते.

ऑटो चालवण्याचा धाडसी निर्णय

अशा परिस्थितीत त्यांनी एक मोठा निर्णय घेतला. शहरात अनेक महिला ऑटो चालवत असल्याचे त्यांनी पाहिले. त्यांना स्वतःलाही ऑटो चालवता येत असल्याने त्यांनीही हे काम करण्याचे ठरवले. त्यांनी एक ऑटो भाड्याने घेतला आणि मुलीला सोबत घेऊन काम सुरू केले.

मुलीसाठी ऑटोमध्ये खास सीट

सुरुवातीला त्यांनी ऑटोच्या मागे मुलीसाठी एक छोटा बिछाना तयार केला होता. पण प्रवासी बसल्यानंतर मुलगी घाबरून रडू लागायची. त्यामुळे नंतर त्यांनी आपल्या शेजारीच मुलीसाठी एक छोटी सीट बसवून घेतली, जिथे तेजू आरामात बसते.

Solapur News : पत्नी पोलीस दलात, स्वत: एसआरपीएफमध्ये; जवानाने अचानक स्वतःला संपवलं, हसता-खेळता संसार उद्ध्वस्त

त्या दररोज साधारण ४०० ते ५०० रुपये कमवत होत्या. त्यातून ऑटोचे भाडे, घरखर्च आणि अन्नाचा खर्च भागवत होत्या. तरीही त्यांनी थोडीथोडी बचत सुरू ठेवली. पाच महिन्यांपूर्वी त्यांनी ईएमआयवर स्वतःचा ऑटो रिक्षा खरेदी केला.

सोशल मीडियावर व्हायरल झालेली कथा

एकदा प्रवाशांची वाट पाहत असताना त्यांनी आपल्या मुलीसोबत ऑटोमध्ये बसलेला एक छोटा व्हिडिओ सोशल मीडियावर शेअर केला. हा व्हिडिओ काही वेळातच व्हायरल झाला. अनेकांनी त्यांच्या जिद्दीचे कौतुक करत त्यांना प्रोत्साहन दिले. अनेकांनी लिहिले, “आई आपल्या मुलासाठी काहीही करू शकते.”

आता त्या रोज आपल्या आणि मुलीच्या आयुष्यातील छोटे क्षण सोशल मीडियावर शेअर करतात आणि लोकांकडून त्यांना मोठा पाठिंबा मिळत आहे.

मुलीच्या शिक्षणासाठी आईची जिद्द

या कष्टाळू आईचे एकच स्वप्न आहे — आपल्या मुलीला इंग्रजी माध्यमाच्या शाळेत शिक्षण द्यायचे. त्या म्हणतात, “मी दहावीनंतर पुढे शिकू शकले नाही, पण माझ्या मुलीला मला मिळू न शकलेले शिक्षण नक्की देणार.”

आज ही कथा केवळ एका ऑटो चालकाची नाही, तर आईच्या संघर्षाची, धैर्याची आणि मुलीचे भविष्य उज्ज्वल करण्याच्या जिद्दीची प्रेरणादायी कहाणी बनली आहे.

लेखकाबद्दलसुनिल लाटेसुनिल प्रभाकर लाटे, हे एक पत्रकार आहेत. त्यांनी डॉ. बाबासाहेब आंबेडकर मराठवाडा विद्यापीठ येथून बी.ए व एम.ए. पत्रकारितेचं पदव्यूत्तर शिक्षण पूर्ण केलं आहे. कॉलेज जीवनातच ‘दैनिक दिव्य मराठी’मध्ये पत्रकारितेचं प्रत्यक्ष प्रशिक्षण घेतलं आहे. दोन वर्षे ‘लोकसत्ता डॉट कॉम’साठी ‘फोटोगॅलरी व वेबस्टोरी’ या विभागात काम केलं आहे. ते ६ ऑक्टोबर २०२५ पासून ‘महाराष्ट्र टाईम्स’ ऑनलाईनमध्ये कार्यरत आहेत. राजकारण, मनोरंजन, क्रीडा या विषयांच्या लिखाणात आवड आहे. याशिवाय काव्य लेखन, गीत लेखन आणि सादरीकरणातही स्वारस्य आहे. फोटोग्राफी, फोटो, व्हिडिओ संपादनातही खास रस आहे… आणखी वाचा