मिळालेल्या माहितीनुसार नागपूर–जबलपूर राष्ट्रीय महामार्गालगत असलेल्या खैरी शिवारातील जंगल परिसरात मंगळवारी सकाळच्या सुमारास सांडपाण्याच्या जवळ एका इसमाचा मृतदेह पडलेला असल्याची माहिती डायल ११२ वरून पोलिसांना मिळाली. माहिती मिळताच नवीन कामठी पोलीस स्टेशनचे पोलीस निरीक्षक महेश आंदळे यांच्या मार्गदर्शनाखाली पोलिसांचे पथक तातडीने घटनास्थळी दाखल झाले.

घटनेची माहिती मिळताच सहाय्यक पोलीस आयुक्त अकुंश खेडकर आणि पोलीस उपायुक्त डॉ. निखिल पखाले यांनीही घटनास्थळी भेट देत परिस्थितीची पाहणी केली. पोलिसांनी पंचनामा करून मृतदेह ताब्यात घेतला. प्राथमिक तपासात मृतदेह चार ते पाच दिवसांपूर्वीचा असल्याचे समोर आले असून तो पूर्णपणे कुजलेल्या अवस्थेत होता. तपासादरम्यान पोलिसांना मृत व्यक्तीच्या चेहऱ्यावर गंभीर मारहाणीच्या खुणा दिसून आल्या. ओळख पटू नये यासाठी चेहऱ्यावर ठेचून मारहाण करण्यात आल्याचा संशय व्यक्त करण्यात येत आहे. याशिवाय मृताच्या पोटावर धारदार शस्त्राने वार केल्याच्या जखमा देखील आढळून आल्या आहेत. या जखमांवरून ही हत्या असल्याचे स्पष्ट होत असल्याचे पोलिसांनी सांगितले.

Sunetra Pawar : बिनविरोध निवडीतून सुनेत्रा पवार अध्यक्ष; माळेगाव कारखान्यात नवी इनिंग

घटनास्थळाची पाहणी करताना पोलिसांना जवळच दारूच्या बाटल्या, सिगारेटचे पाकिट, चपला तसेच रक्ताचे डाग आढळून आले. त्यामुळे या ठिकाणी आधी काही जणांमध्ये बसून मद्यपान झाले असावे आणि त्यानंतर भांडण होऊन ही हत्या घडली असावी, असा प्राथमिक अंदाज पोलिसांनी व्यक्त केला आहे.

दरम्यान मृतदेह सांडपाण्याजवळ पडलेला असल्याने आणि चार-पाच दिवसांपासून तो तिथेच असल्याने कुजण्याची प्रक्रिया सुरू झाली होती. तसेच परिसरातील मोकाट कुत्र्यांनी मृतदेहाचे लचके तोडल्यामुळे मृतदेहाची अवस्था अधिक विद्रूप झाल्याचे पोलिसांनी सांगितले. पोलिसांनी मृतदेह ताब्यात घेऊन शवविच्छेदनासाठी कामठी उपजिल्हा रुग्णालयात पाठविला आहे. अद्याप मृत व्यक्तीची ओळख पटलेली नसून पोलिसांकडून परिसरातील सीसीटीव्ही फुटेज तपासणे, बेपत्ता व्यक्तींची नोंद तपासणे आणि स्थानिकांकडून माहिती गोळा करण्याचे काम सुरू आहे.

या प्रकरणातील नेमकी पार्श्वभूमी काय आहे, मृत व्यक्ती कोण आहे आणि हत्या कोणी व कोणत्या कारणासाठी केली याचा शोध घेण्यासाठी नवीन कामठी पोलीस विविध अंगाने तपास करत आहेत.

लेखकाबद्दलसुनिल लाटेसुनिल प्रभाकर लाटे, हे एक पत्रकार आहेत. त्यांनी डॉ. बाबासाहेब आंबेडकर मराठवाडा विद्यापीठ येथून बी.ए व एम.ए. पत्रकारितेचं पदव्यूत्तर शिक्षण पूर्ण केलं आहे. कॉलेज जीवनातच ‘दैनिक दिव्य मराठी’मध्ये पत्रकारितेचं प्रत्यक्ष प्रशिक्षण घेतलं आहे. दोन वर्षे ‘लोकसत्ता डॉट कॉम’साठी ‘फोटोगॅलरी व वेबस्टोरी’ या विभागात काम केलं आहे. ते ६ ऑक्टोबर २०२५ पासून ‘महाराष्ट्र टाईम्स’ ऑनलाईनमध्ये कार्यरत आहेत. राजकारण, मनोरंजन, क्रीडा या विषयांच्या लिखाणात आवड आहे. याशिवाय काव्य लेखन, गीत लेखन आणि सादरीकरणातही स्वारस्य आहे. फोटोग्राफी, फोटो, व्हिडिओ संपादनातही खास रस आहे… आणखी वाचा