नेमकं काय घडलं?

कारमधील मुखीद शेख आणि निलोफर मुखीद शेख (रा. कोरडगाव, ता. शेवगाव) हे प्रवासी तर रावसाहेब खडेकर असं बचावकार्यासाठी पाण्यात उतरलेला स्थानिक बेपत्ता तरुणाचं नाव आहे. दरम्यान, या प्रकरणी स्थानिकांकडून मिळालेल्या माहितीनुसार, काल सोमवारी रात्री 11 ते 11:30च्या सुमारास अलताफ पठाण हे आपली स्विफ्ट कार एमएच 12 केजे 9032 घेऊन जात होते. कारमध्ये त्यांच्यासोबत मुखीद शेख आणि त्यांच्या पत्नी निलोफर मुखीद शेख हे प्रवास करत होते. चांगतपुरी गावाजवळील कालव्याच्या पुलाजवळ चालकाला रस्त्याचा अंदाज न आल्याने कार थेट पाण्यात कोसळली.

बचावकार्य करताना दुसरी दुर्घटना

कार कालव्यात पडताच चालक अलताफ पठाण यांनी प्रसंगावधान राखत कारबाहेर उडी मारली आणि ते सुखरूप बचावले. मात्र, कारमधील पती-पत्नी गाडीसह पाण्यात बुडाले. ही घटना समजताच स्थानिक नागरिक मदतीसाठी धावले. यावेळी चांगतपुरी येथील रावसाहेब खडेकर हा तरुण या दाम्पत्याला वाचवण्यासाठी जीवाची पर्या न करता पाण्यात उतरला. दुर्दैवाने, पाण्याचा प्रवाह जोरात असल्याने रावसाहेब देखील पती-पत्नीसह बेपत्ता झाला आहे. घटनेनंतर सरपंच स्थानिकांनी प्रशासनाला माहिती दिली. रात्री उशिरा जेसीबीच्या साहाय्याने कार कालव्यातून बाहेर काढण्यात आली. मात्र, बेपत्ता झालेल्या तिघांचा शोध लागला नाही.पोलीस आणि स्थानिक नागरिक शोधकार्य राबवत आहेत.

मराठवाड्यातील 5 जिल्ह्यांना अवकाळीने झोडपलं

बंगालच्या उपसागरात निर्माण झालेल्या कमी दाबाच्या क्षेत्रामुळे मराठवाड्यातील हवामानात बदल झाला आहे. सोमवारी पहाटे मराठवाड्यातील धाराशिव, लातूर, हिंगोली, नांदेड, परभणी जिल्ह्यांना अवकाळी पावसाने झोडपले. बीडसह अन्य जिल्ह्यांत ढगाळ वातावरण होते. दरम्यान सोमवारी रात्री धाराशिवमध्ये पुन्हा पावसाने हजेरी लावली. लातूर जिल्ह्यात गारपीट झाल्याने पिकांचे नुकसान झाले. सोमवारी सकाळी धाराशिव शहरासह जिल्ह्याच्या विविध भागात हलक्या ते मध्यम स्वरुपाच्या पावसाच्या सरी कोसळल्या. उमरगा तालुक्यातील बहुतांश भागात पावसाने हजेरी लावली. त्याचा जनजीवनावर परिणाम दिसून आला.