छत्रपती संभाजीनगर महापालिकेवर साडेतीन दशकांपेक्षा जास्त काळापासून शिवसेना भाजपचीच सत्ता राहिली आहे. अपवाद वगळता सर्व निवडणुका युती म्हणूनच लढल्या गेल्या. यात भाजपची भूमिका नेहमीच छोट्या भावाची राहिली. १९८८ मध्ये झालेल्या निवडणुकीत भाजपला एकही जागा जिंकता आली नव्हती. परंतु नुकत्याच झालेल्या निवडणुकीत स्वबळावर रिंगणात उतरलेल्या भाजपने ११५ जागांपैकी तब्बल ५७ जागांवर यश मिळवत महापालिकेवर एकहाती सत्ता मिळवली. विशेष म्हणजे महापालिकेच्या स्थापनेपासून कोणत्याही एका पक्षाला बहुमत मिळविता आले नाही. ही किमया भाजपने करुन दाखविली.

विकसित छत्रपती संभाजीनगर असा मुद्दा प्रचार मांडणारे भाजप विजयाचा गुलाल उडविल्यानंतर तातडीने महापौर, गटनेता आदी पदाचे नाव निश्चित करेल, अशी अपेक्षा होती. परंतु कोणा एका नावावर स्थानिक नेत्यांचे एकमत न झाल्याने अखेर कोअर कमिटीने महापौरसह अन्य पदासाठी नावाची यादी प्रदेश नेत्यांकडे मंगळवारी सादर केली. याबाबत बुधवारी निर्णय होईल, अशी अपेक्षा होती. परंतु सायंकाळपर्यंत वरिष्ठ पातळीवरुन निरोप न आल्याने उद्या गुरुवारी नावाची घोषणा होईल, असे भाजपच्या सूत्रांनी नमूद केले. यासंदर्भात शहराध्यक्ष किशोर शितोळे यांना संपर्क साधला असता त्यांनी गुरुवारी दुपारपर्यंत नावे प्रदेशाकडून निश्चित होईल, असे नमूद केले.

दरम्यान, महापौर हे खुल्या प्रवर्गासाठी आहे. त्यात इच्छुकांची संख्या देखील अधिक असून त्यापैकी काही नावांसाठी स्थानिक नेत्यांचा देखील आग्रह असल्याचे बोलले जात आहे. यावर तोडगा म्हणून महापौरपदासाठी सव्वा-सव्वा वर्षाचा फार्म्युला असेल, अशी चर्चा होत असून याबाबत मात्र अधिकृत तपशील समजू शकला नाही.