उपमुख्यमंत्री अजित पवारांच्या निधनानं महाराष्ट्र शोकसागरात लोटला गेला आहे. सकाळी सव्वा आठच्या सुमारास Ajit Pawar मुंबईहून पुण्याला जाण्यास निघाले. त्यांच्या चार्टर्ड प्लेनला लँडिंगवेळी अपघात झाला. अपघात होताच विमानानं पेट घेतला. त्यानंतर मोठा स्फोट झाला. विमानात अजित पवारांसह पाच जण होते. यातील कोणीही वाचू शकलं नाही.

चार्टर्ड विमानाला अपघात होताच आगीचे लोळ उठू लागले. यानंतर आसपासचे लोक घटनास्थळी धावले. अजित पवारांच्या मृतदेहाची ओळख त्यांच्या घड्याळावरुन पटली. अजित पवार बऱ्याचदा चंदेरी रंगाचं, काळ्या रंगाची डायल असलेलं घड्याळ घालायचे. अतिशय वक्तशीर असणाऱ्या, घड्याळ्याच्या काट्यावर चालणाऱ्या अजित पवारांच्या मृतदेहाची ओळख त्यांच्या हातातील घड्याळावरुन पटली. अजित पवारांच्या मृत्यूवेळी हा क्रूर योगायोग पाहायला मिळाला.

Ajit Pawar १९९१ मध्ये पहिल्यांदा खासदार झाले. काँग्रेसकडून ते निवडून गेले. पण अवघ्या काही महिन्यांत त्यांनी लोकसभेची जागा शरद पवारांसाठी सोडली. मग अजित पवार विधानसभेत आले. १९९१ पासून अजित पवार बारामतीचे आमदार राहिले. याच बारामतीच्या भूमीत अजित पवारांनी अखेरचा श्वास घेतला. १९९१ आणि १९९५ मध्ये ते काँग्रेसकडून विधानसभा लढले आणि विजयी झाले.

१९९९ मध्ये शरद पवारांनी राष्ट्रवादी काँग्रेसची स्थापना केली. पक्षाला घड्याळ चिन्ह मिळालं. याच घड्याळासाठी अजित पवार अखेरपर्यंत झटत राहिले. याच चिन्हावर ते सहावेळा विधानसभा निवडणूक लढले आणि विजयी झाले. तब्बल २७ वर्षे अजित पवार आणि घड्याळ हे समीकरण कायम राहिलं. २०२३ मध्ये अजित पवारांनी शरद पवारांची साथ सोडली. राष्ट्रवादी काँग्रेसचं नेतृत्व त्यांनी स्वत:कडे घेतलं. त्यानंतरही घड्याळ चिन्ह अजित पवारांकडे राहिलं. याच घड्याळावरुन अजित पवारांच्या मृतदेहाची ओळख पटावी, हा दुर्दैवी योगायोग म्हणावा लागेल.