म. टा. वृत्तसेवा नाशिकरोड: पोटाची खळगी भरण्यासाठी कोसो दूर असलेल्या खंडवा (मध्य प्रदेश) येथून एकलहरे येथे वीटभट्टीवर मातीकाम करण्यासाठी आलेल्या कष्टकरी आई-बापाची आपल्या अवघ्या तेरा महिन्यांच्या पोटच्या गोळ्यावरील नजर क्षणभरासाठी हटली आणि त्यांचा हा रांगणारा चिमुरडा पाण्याच्या खड्ड्यात पडल्याने त्याच्या जीवनाची वेल अवेळी तुटली.
काय घडलं?
काळजाला चटका लावणाऱ्या या दुर्घटनेत मृत्यू पावलेल्या चिमुरड्याचे नाव प्रतीक मुकेश जमरे (वय १३ महिने) असे आहे. ही दुर्घटना एकलहरे गेटवरील प्रकाश राऊत यांच्या वीटभट्टीवर घडली. मयत झालेल्या प्रतीकचे आई-वडील वीटभट्टीवर मातीकाम करतात. त्यांचा प्रतीक हा अवघा तेरा महिन्यांचा मुलगा ते काम करीत असलेल्या ठिकाणीच रांगत, खेळत असे. वीटभट्टीवर जवळच त्याला ठेवून त्याचे आई-वडील विटांचे आणि मातीचे ढिगारे उपसण्याचे काम करीत असताना, अधूनमधून प्रतीककडे दोघे लक्ष देत असत.
Nashik Crime: मलबार गोल्ड अँड डायमंड कंपनीची मोठी फसवणूक; दहा लाखांची नाणी कुरिअरमध्ये गायब, प्रकरण काय?
शुक्रवारी सकाळी नेहमीप्रमाणे प्रतीक त्याचे आई-वडील काम करीत असलेल्या ठिकाणी जवळच रांगत होता. त्याचे आई-वडीलही माती उपसण्याच्या कामात व्यस्त झाले अन् काही क्षणात होत्याचे नव्हते झाले. लहानगा प्रतीक रांगत रांगत जवळच विटकामासाठी पाणी साठवून ठेवलेल्या खड्ड्याकडे गेला आणि खड्ड्यातील पाण्यात पडला. काही वेळाने त्याचे वडील हातचे सोडून प्रतीकला जेथे ठेवलेले होते, तेथे बघण्यासाठी आले असता, प्रतीक त्यांना जागेवर मिळून आला नाही. त्यामुळे त्यांची पत्नी आणि त्यांनी दोघांनी त्याचा आजूबाजूला शोध घेतला असता, त्यांना त्यांचा चिमुरडा खड्ड्यातील पाण्यात पडलेला दिसला. घाबरलेल्या आई-वडिलांनी प्रतीकला लागलीच पाण्यातून उचलून बाहेर काढले.
Nashik Crime: शॉकिंग! दारु न दिल्याने बारमालकावर हल्ला; दोन कारसह घरही पेटवलं, नाशिकमधील थरारक घटना
बेशुद्ध प्रतीकला त्यांनी पालिकेच्या नाशिकरोड येथील बिटको रुग्णालयात उपचारासाठी दाखल केले. मात्र डॉ. चव्हाण यांनी प्रतीकला मयत झाल्याचे घोषित केल्याने त्याच्या कष्टकरी पालकांवर दुःखाचा डोंगर कोसळला. गावाहून येताना हाताच्या पाळण्यात आणलेल्या आपल्या चिमुरड्याच्या कलेवर त्याच हातांच्या पाळण्यात गावी नेण्याची दुर्दैवी वेळ या अभागी आई-वडिलांवर ओढवल्याने हळहळ व्यक्त केली गेली. या प्रकरणी नाशिकरोड पोलिस ठाण्यात आकस्मिक मृत्यूची नोंद करण्यात आली आहे.
Nashik Crime: 400 कोटींच्या कंटेनर लुटीचं ‘घोटी’ कनेक्शन, मुंबईत एकाचं अपहरण; महामार्गावर थरार, पोलिसांच्या जाळ्यात अडकले बडे मासे
वीटभट्टीवरील बालकांची सुरक्षा रामभरोसे
शहराच्या आजूबाजूला असलेल्या ग्रामीण भागात ठिकठिकाणी वीटभट्ट्या आहेत. या वीटभट्टीवर काम करणाऱ्या मजुरांच्या मुलांचे बालपणदेखील वीटभट्टीवरील प्रदूषण आणि सोयी सुविधांअभावी होरपळत असते. खासकरून आरोग्य आणि सुरक्षाविषयक उपाययोजनांचा या ठिकाणी थांगपत्ताच नसतो. वीटभट्टीवर काम करणाऱ्या मजुरांच्या मुलांची सुरक्षा रामभरोसे असल्याचे एकलहरे येथे घडलेल्या घटनेतून समोर आले आहे.
लेखकाबद्दलकिशोरी तेलकर किशोरी तेलकर, महाराष्ट्र टाइम्स ऑनलाईनमध्ये ३ वर्षांपासून कन्सल्टंट म्हणून कार्यरत आहे.या आधी सकाळ मिडियामध्ये २ वर्ष कामाचा अनुभव आहे. चालू घडामोडी, गुन्हेगारी, राजकीय विषयांच्या बातम्यांत विशेष आवड.… आणखी वाचा