शिवसेना उद्धव बाळासाहेब ठाकरे पक्षाकडून गटनेता निवडीची बैठक आयोजित करण्यात आली होती. या बैठकीचं सर्व नगरसेवकांना निमंत्रण देण्यात आलं होतं. 11 पैकी 9 नगरसेवकांशी संपर्क करुन त्यांना बैठकीचं निमंत्रण देण्यात आलं होतं. तर 2 नगरसेवक हे नॉट रिचेबल असल्याने त्यांच्या घरातील सदस्यांच्या हातात याबाबतची नोटीस देण्यात आली होती. पण तरीही ते बैठकीला आले नाहीत. ते दोन्ही नगरसेवक अद्यापही नॉट रिचेबल असल्याची माहिती आहे.

7 नगरसेवकांचा गट स्थापन

दरम्यान, शिवसेना ठाकरे गटाच्या 11 पैकी 7 नगरसेवकांनी गटनेता निवडीच्या बैठकीला हजेरी लावली. यावेळी सात जणांचा गट स्थापन करण्यात आला. कोकण मंडळात नोंदणी करण्यात आली. उमेश बोरगावकर यांची गटनेता पदी नियुक्ती करण्यात आली आहे. ठाकरे गटाचे शहरप्रमुख बाळा परब यांनी याबाबत सविस्तर माहिती दिली आहे. जे नगरसेवक गैरहजर होते त्यांच्यावर आता अपात्रतेची कारवाई होईल, असं त्यांनी सांगितलं आहे.

बाळा परब नेमकं काय म्हणाले?

“गेल्या चार-पाच दिवसांत अतिशय धावपळ सुरु होती. कल्याण डोंबिवली महापालिकेच्या निवडणुकीत शिवसेना उद्धव बाळासाहेब ठाकरे पक्षाचे 11 नगरसेवक निवडून आले आहेत. ते निवडून आल्यानंतर पुढची जी प्रक्रिया असते ती पूर्ण झालेली आहे. त्या प्रक्रियेप्रमाणे शिवसेनेचा गट स्थापन झाला आहे. गटनेतेपदी उमेश बोरगावकर यांची निवड झाली आहे. पक्ष प्रतोद म्हणून शंकेश भोईर यांची निवड झाली आहे”, अशी माहिती बाळा परब यांनी दिली.

“जे संपर्कात आहेत त्यामध्ये राहुल कोट आणि स्वप्नाली केणे यांच्याशी संपर्क साधूनही ते गटनेते पदाच्या निवडीच्या बैठकीला आले नाहीत. तर दुसरे मधुर म्हात्रे आणि कीर्ती ढोणे हे नॉट रिचेबल आहेत. त्यांचा संपर्क होत नाहीत. ते लवकरच संपर्कात येतील. ते संपर्कात आल्यानंतर पक्षाकडून त्यांच्यावर अपात्रतेची कारवाई करण्यात येईल”, अशी प्रतिक्रिया शहरप्रमुख बाळा परब यांनी दिली.