सोलापूरच्या राजकारणात ठिणगी! खासदार प्रणिती शिंदे आणि पालकमंत्री जयकुमार गोरे यांच्यात शाब्दिक युद्ध रंगलं आहे. ‘संधीसाधू’ आणि ‘काँग्रेसचं वाटोळं’ अशा शेलक्या शब्दांत एकमेकांवर वार-प्रतिवार करण्यात आले आहेत.
“गोरे संधीसाधू, भाजपच्या आमिषाला बळी पडले”; प्रणिती शिंदेंचा सडेतोड प्रहार
पालकमंत्री जयकुमार गोरे यांनी केलेल्या टीकेला उत्तर देताना खासदार प्रणिती शिंदे यांनी त्यांना ‘संधीसाधू’ संबोधले. त्या म्हणाल्या, “जयकुमार गोरे हे मूळचे काँग्रेसी आहेत, म्हणूनच त्यांनी काँग्रेस कार्यकर्त्यांसाठी असलेले माझे पत्र वाचले असावे. ते भाजपच्या आमिषाला बळी पडून त्या पक्षात गेले आहेत. सोलापूर हे सुसंस्कृत शहर आहे, बाहेरच्या लोकांनी येऊन इथली पातळी कमी करू नये. काही लोकांच्या डोक्यात सत्ता गेली आहे.”
“बापाने काँग्रेस वाढवली, पोरीने वाटोळं केलं”; जयकुमार गोरेंची बोचरी टीका
प्रणिती शिंदेंच्या टीकेला प्रत्युत्तर देताना पालकमंत्री जयकुमार गोरे यांनी थेट सुशीलकुमार शिंदेंचा उल्लेख करत निशाणा साधला. गोरे म्हणाले, “माजी केंद्रीय मंत्री सुशीलकुमार शिंदेंनी आयुष्यभर काँग्रेस वाढवली, अनेकांना सांभाळले. मात्र, प्रणिती शिंदेंनी काँग्रेसचे वाटोळं केले. कार्यकर्त्यांना गरज असताना त्यांनी त्यांना वाऱ्यावर सोडले. केवळ दोन नगरसेवक निवडून आल्यावर त्यांना समाधान वाटतेय आणि ८७ नगरसेवक असलेल्या भाजपवर त्या टीका करत आहेत.”
Nashik News: नियतीचा क्रूर घाला! वडिलांच्या निधनाचे दुःख पचेना; 21 वर्षीय मुलाचीही विहिरीत आढळली बॉडी, शुभमसोबत काय घडलं?
‘मी नाव घेतलं तर त्यांना लागणारच!’
प्रणिती शिंदेंनी केलेल्या सन्मानाचा उल्लेख करत गोरेंनी टोला लगावला. “त्यांनी सुरुवातीला माझे नाव खूप सन्मानाने घेतले, त्यामुळे माझे वाक्य त्यांना लागणे स्वाभाविकच आहे. स्वतः दुसऱ्याचा सन्मान करायला शिका, तरच लोक तुमचा सन्मान करतील,” असे गोरे यांनी ठणकावून सांगितले. तसेच, लोकसभेत प्रणिती शिंदेंनी काय ‘संधीसाधूपणा’ केला, यावर मला बोलायला लावू नका, असा गर्भित इशाराही त्यांनी दिला.
जिल्हा परिषदेसाठी ‘आघाडी’चे संकेत
या वादाच्या पार्श्वभूमीवर प्रणिती शिंदे यांनी आगामी निवडणुकांबाबत महत्त्वाची भूमिका मांडली. “सोलापूर जिल्हा परिषद आणि पंचायत समितीच्या निवडणुकीत जिथे शक्य आहे, तिथे आम्ही महाविकास आघाडी करू. भाजप कितीही साम, दाम आणि ईव्हीएमचा वापर करो, काँग्रेस जिंकण्यासाठी आणि त्यांना टक्कर देण्यासाठी पूर्ण ताकदीने लढणार,” असे त्यांनी स्पष्ट केले.
दरम्यान, सध्या सोलापुरात या दोन नेत्यांमध्ये सुरू असलेल्या या वादामुळे राजकीय वर्तुळात मोठी चर्चा रंगली आहे. ग्रामीण भागातील लोकांमधला रोष आणि शहरी भागातील व्होटिंग पॅटर्न यावरून आता काँग्रेस आणि भाजपमध्ये जुंपल्याचे दिसत आहे.
लेखकाबद्दलसुनिल लाटेसुनिल प्रभाकर लाटे, हे एक पत्रकार आहेत. त्यांनी डॉ. बाबासाहेब आंबेडकर मराठवाडा विद्यापीठ येथून बी.ए व एम.ए. पत्रकारितेचं पदव्यूत्तर शिक्षण पूर्ण केलं आहे. कॉलेज जीवनातच ‘दैनिक दिव्य मराठी’मध्ये पत्रकारितेचं प्रत्यक्ष प्रशिक्षण घेतलं आहे. दोन वर्षे ‘लोकसत्ता डॉट कॉम’साठी ‘फोटोगॅलरी व वेबस्टोरी’ या विभागात काम केलं आहे. ते ६ ऑक्टोबर २०२५ पासून ‘महाराष्ट्र टाईम्स’ ऑनलाईनमध्ये कार्यरत आहेत. राजकारण, मनोरंजन, क्रीडा या विषयांच्या लिखाणात आवड आहे. याशिवाय काव्य लेखन, गीत लेखन आणि सादरीकरणातही स्वारस्य आहे. फोटोग्राफी, फोटो, व्हिडिओ संपादनातही खास रस आहे… आणखी वाचा