त्यातच आता काँग्रेसकडून शिंदेसेनेला सोबत घेऊन युतीच्या चर्चांना उधाण आले आहे. तर काँग्रेसचे विधानपरिषद गटनेते आमदार सतेज पाटील यांनीही याबाबत थेट गुगली टाकणारं वक्तव्य केल्याने नेमकं काय होणार याच्याच चर्चा रंगू लागल्या आहेत.

सतेज पाटलांच्या सूचक विधानानं सस्पेन्स वाढला..
महापौर पदाच्या आरक्षणाची घोषणा आणि गॅझेट बाहेर पडण्याची प्रक्रिया अद्याप पूर्ण झालेली नसताना राजकीय घडामोडींना वेग आला आहे. मुंबईत निवडून आलेल्या नगरसेवकांना वेगळे ठेवून सत्ताधारी आणि विरोधकांच्या चर्चा तीव्र झाल्या आहेत. याच पार्श्वभूमीवर आमदार सतेज पाटील यांना पत्रकार परिषदेत काँग्रेस आणि शिवसेना शिंदे गटाची युती होणार का, असा प्रश्न विचारण्यात आला. आ. पाटील यांनी उत्तर देताना, “बॅकडोअर चर्चा जाहीर कशा करायच्या? आज त्यावर बोलू शकत नाही. अजून वेळ आहे, गॅझेट आणि महापौर आरक्षण निघायचे आहे,” अशी भूमिका घेतली. या सूचक विधानामुळे राजकीय वर्तुळात खळबळ उडाली असून, पडद्यामागे खरोखरच युतीचे प्रयत्न सुरू असल्याच्या जोरदार चर्चा सुरु झाल्या आहेत.

शिवसेना शिंदे गट किंगमेकर; काँग्रेसकडून खेचण्याचे प्रयत्न?
काँग्रेसला थोडक्यात बहुमत हुकले असले, तरी हातातोंडाशी आलेली सत्ता गमावण्याचे दु:ख त्यांना आहे. गेल्या वेळी काँग्रेस-राष्ट्रवादीने एकत्र येऊन सत्ता स्थापन केली होती आणि शिवसेनेने बाहेरून पाठिंबा दिला होता. आता मात्र शिवसेना शिंदे गटाच्या 15 जागा किंगमेकर ठरु शकतात. काँग्रेस आणि शिंदे गट एकत्र आल्यास (34+15=49) स्पष्ट बहुमत मिळेल आणि महायुतीची (विशेषत: भाजपची) महापौरपदाची स्वप्ने धुळीला मिळतील. महायुतीकडून मात्र मुंबईत नगरसेवकांना एकत्र ठेवण्याचे प्रयत्न सुरू असल्याचे सांगितले जात आहे, तरी अंतिम चित्र काय येणार हे गॅझेट निघाल्यानंतर स्पष्ट होईल.

दरम्यान राजकीय निरीक्षकांच्या मते, सतेज पाटील यांच्या नेतृत्वाखाली काँग्रेस पुन्हा सत्तेत येण्यासाठी जोरदार मोर्चेबांधणी करत आहे. निवडणुकीत एकहाती लढलेल्या काँग्रेसने आता वेगळा पर्याय निवडण्याचा विचार सुरू केला आहे.