आर्थिक गुन्हे शाखेच्या अधिकाऱ्यानं दिलेल्या माहितीनुसार, आरोपी रोशन भूषण शेठनं फसवणुकीच्या पैशातून आलिशान फ्लॅट, महागड्या कार आणि घड्याळं खरेदी केली. तो अतिशय विलासी आयुष्य जगत होता. महाराष्ट्र आणि गुजरातमधील ४२ जणांना गुंतवणुकीवर महिन्याला ५ टक्के व्याजाचं आमिष त्यानं दाखवलं होतं.

आर्थिक गुन्हे शाखेच्या अधिकाऱ्यानं दिलेल्या माहितीनुसार, गुजरातच्या वलसाडमधील एका रहिवासी इमारतीमधून सेठला अटक करण्यात आली. सेठनं गुंतवणूकदारांना नफ्याचा खोटा तपशील दाखवला. त्यांचे पैसे शेअर बाजारात गुंतवले असल्याचं सांगितलं. सेठची मूळ गुंतवणूक ५ कोटी रुपयांची आहे. पण एकूण नुकसान जवळपास ३०.२६ कोटी रुपयांचं आहे.

मुंबईच्या कांदिवलीत राहणाऱ्या संजय शाह यांनी एप्रिलमध्ये मुंबई पोलीस आयुक्त देवेन भारती यांच्याशी संपर्क साधला होता. आपल्या कुटुंबाची १०.८१ कोटी रुपयांची फसवणूक झाल्याचा आरोप दावा त्यांनी केला. तपासातून समोर आलेल्या माहितीनुसार, सेठनं २०२० मध्ये ‘इन्वेस्टाक’ नावाचं ट्रेडिंग ऍप तयार करण्याच्या बहाण्यानं शाहच्या सॉफ्टवेअर इंजिनीअर मुलाशी मैत्री केली. सेठनं शाहांच्या कुटुंबाला मोठ्या परताव्याच्या आमिषानं गुंतवणूक करण्यास भाग पाडलं. याच प्रकारे त्यानं अन्य गुंतवणूकदार गळाला लावले.

आर्थिक गुन्हे शाखेच्या एका पथकानं सेठचा माग काढला. वलसाडच्या एका रहिवासी इमारतीत सेठ राहात होता. अधिकाऱ्यांनी तीन दिवस त्याच्यावर नजर ठेवली. सफाई कर्मचाऱ्यांचे कपडे घालून अधिकारी त्याच्या घरी पोहोचले आणि त्याला अटक केली. आपली ओळख लपवण्यासाठी सेठ तीन नावांचा वापर करत होता. सोबतच विगदेखील वापरत होता.

तरुण असताना तो जयेश हसमुखभाई शाह नाव वापरायचा. दिल्लीत असताना तो राहुल अतुलभाई पारेख नावानं वावरायचा. मुंबईत त्यानं रोशन भूषण सेठ नावानं ओळखला जायचा. पोलिसांनी त्याच्याकडून एक बीएमडब्ल्यू, एक मर्सिडीज, एक महिंद्रा थार, १४ महागडी घड्याळं, १.६७ कोटींचे सोन्याचे दागिने आणि १७ लाख रुपयांची रोकड जप्त केली आहे.