पाच शिलेदार महापालिकेत भाजपचा बालेकिल्ला म्हणून ओळख असणाऱ्या पनवेल महापालिकेत शिवसेना ठाकरेगटाचे पाच नगरसेवक निवडून आले आहेत. एकसंध शिवसेना असताना या महापालिकेत एकही नगरसेवक नसण्याची नामुष्की शिवसेनेवर ओढावली होती. मात्र यावेळी शिवसेना ठाकरे गटाने चांगले यश मिळवले आहे. शिवसेनेच्या विजयी उमेदवारांमध्ये लीना गरड, उत्तम मोरबेकर, मेघना घाडगे- भिसे, प्रिया गोवारी, रितीक्षा गोवारी यांचा समावेश आहे.

पक्षीय बलाबल

पनवेल महापालिका निडवणुकीतीलनिकालानुसार, भाजप-55, शेकाप-9, शिवसेना ठाकरे गट – 5, काँग्रेस – 4, राष्ट्रवादी अजित पवार – 2, शिवसेना शिंदे गट-2, अपक्ष-1 असे पक्षीय बलाबल आहे. पनवेल महापालिकेत पुन्हा एकदा भाजपची सत्ता येणार हे या आकडेवारीवरून स्पष्ट होत आहे. या महापालिकेच्या निवडणुकीत भाजप, शिवसेना शिंदे गट, आरपीआय यांनी एकत्र येत निवडणूक लढवली होती. तर शिवसेना ठाकरे गट, शेकाप, काँग्रेस या महाविकास आघाडीतील पक्षांनी एकत्र येत निवडणूक लढवली होते. त्यांचे एकूण 18 नगरसेवक निवडून आले आहेत. महायुतीचा घटक पक्ष असलेल्या आरपीआयला मात्र येथे सपशेल अपयश आले.

दिलासा देणारा विजय

अनेक महापालिकांमध्ये ठाकरे गटाचे प्राबल्य कमी होत आहे. ठाकरेंकडून मुंबईवर सर्वाधिक लक्ष देण्यात आले होते. तर ठाणे, नाशिक, छत्रपती संभाजीनगर येथे काही प्रमाणात ताकद लावण्यात आली होती. मुंबईत ठाकरेंची कामगिरी समाधानकारक राहिली. परभणी वगळता इतर महापालिकेत मात्र पदरी निराशाच पडली. मात्र पनवेलमध्ये मिळालेला विजय हा पक्षासाठी दिलासा देणारा ठरला आहे.