नांदेड, दि. १६ जानेवारी : ‘हिंद दी चादर’ या कार्यक्रमाच्या प्रचार–प्रसिद्धीसाठी आज जिल्ह्यातील शाळा चिमुकल्या विद्यार्थ्यांच्या जयघोषाने दुमदुमून गेल्या. उत्साहात सहभागी झालेल्या विद्यार्थ्यांनी प्रभातफेऱ्यांद्वारे ‘हिंद दी चादर – श्री गुरु तेग बहादूर’ या जयघोषाने शाळा व परिसर भारावून टाकला. त्यामुळे सर्वत्र देशभक्तीमय वातावरण निर्माण झाले.

आजपासून जिल्ह्यातील विविध शाळांमध्ये प्रभातफेऱ्यांच्या माध्यमातून ‘हिंद दी चादर’ कार्यक्रमाची प्रभावी प्रचार–प्रसिद्धी करण्यात येत आहे. आज कंधार तालुक्यातील जि.प.प्राथमिक शाळा, नागापूर येथे विद्यार्थ्यांनी प्रभातफेरी काढून या उपक्रमाची सुरुवात केली. प्रभातफेऱ्या तसेच विविध स्पर्धांमध्ये विद्यार्थ्यांचा उत्स्फूर्त सहभाग दिसून आला.

या मोहिमेअंतर्गत जिल्ह्यातील विविध शाळांमध्ये निबंध, चित्रकला, वक्तृत्व, गायन अशा विविध स्पर्धांचे आयोजन करण्यात आले असून ‘हिंद दी चादर’ विषयावरील डॉक्युमेंट्री, चित्रपट व गीतांचे सादरीकरणही केले जात आहे. श्री गुरु तेग बहादूर साहिबजी यांच्या त्याग, बलिदान आणि धर्मनिष्ठेचा संदेश विद्यार्थ्यांपर्यंत पोहोचवणे, हा या उपक्रमाचा मुख्य उद्देश आहे.

०००००