मुंबई: राज्यात आज मुंबईसह 29 महापालिका निवडणुकांसाठी मतदान पार पडलं. यावेळी मुंबईत पहिल्यांदा ठाकरे बंधू उद्धव ठाकरे आणि राज ठाकरे हे एकत्र निवडणुकीला उतरले. त्यामुळे महायुती विरुद्ध ठाकरे बंधू असा मुकाबला मुंबईत पाहायला मिळाला. ठाकरे बंधू एकत्र आल्याने ते महायुतीवर भारी पडतील असे अंदाज बांधले जात होते. मात्र,एक्झिट पोलचे जे आकडे समोर आले आहेत ते अत्यंत धक्कादायक आहेत.
आतापर्यंत वेगवेगळे एक्झिट पोलचे आकडे समोर आले आहेत. मात्र, यासर्वांमध्ये ठाकरे बंधू मागे पडताना दिसत आहेत. त्यामुळे गेल्या 25 वर्षांपासून मुंबई महापालिकेत सत्तेत असलेल्या उद्धव ठाकरेंच्या हातून मुबंई सुटण्याची शक्यता वर्तवली जात आहे.
कुठल्या एक्झिट पोलमध्ये कोण वरचढ?
जनमतच्या समोर आलेल्या एक्झिट पोलनुसार, मुंबई महानगरपालिकेत शिवसेना उबाठा, मनसे आणि राष्ट्रवादी काँग्रेस शप यांच्या युतीला 62 जागा मिळण्याचा अंदाज वर्तवण्यात आला आहे. भाजप, शिंदेसेनेच्या महायुतीला 138 जागा मिळण्याची शक्यता आहे. काँग्रेस आणि वंचित बहुजन आघाडी यांना 20 जागा मिळती, असा अंदाज आहे. त्यामुळे या अंदाजानुसार भाजप बाजी मारताना दिसत आहे.
टाइम्स नाऊच्या एक्झिट पोलनुसार, मुंबईत भाजपला सर्वाधिक मतदान टक्का मिळणार असल्याचा अंदाज वर्तवण्यात आला आहे. तर, शिवसेना उबाठा – मनसेला 34-37 टक्के जागा येणार असल्याचा अंदाज वर्तवला आहे.
महायुती : 42-45 टक्के
शिवसेना ठाकरे- मनसे : 34-37 टक्के
काँग्रेस- वंचित : 13-15 टक्के
इतर : 6-8 टक्के
लोकशाही आणि रुद्र रिसर्च यांच्या एक्झिट पोलनुसार, मुंबईत भाजप आणि शिंदेंच्या शिवसेनेला 121 जागा मिळण्याची शक्यता वर्तवण्यात आली आहे. तर ठाकरे बंधूंना 71 जागा मिळण्यात शक्यता आहे.
भाजप शिवसेना – 121
शिवसेना ठाकरे- मनसे – 71
काँग्रेस वंचित – 25
इतर – 10
एक्सिस माय इंडियाच्या एक्झिट पोलनुसार, मुंबईत महायुतीला 131-151 जागा मिळण्याची शक्यता वर्तवण्यात आली आहे. तर ठाकरे बंधूंच्या युतीला 58-68 जागा मिळणार असल्याची शक्यता आहे.
भाजप शिंदे – 131- 151
ठाकरे- मनसे – 58-68
काँग्रेस-वंचित – 12-16
इतर – 6-12