पुणे: पुणे महानगरपालिकेच्या १६५ जागांसाठी उद्या, १५ जानेवारी रोजी मतदान प्रक्रिया पार पडत आहे. या पार्श्वभूमीवर शहरात राजकीय हालचालींना वेग आला असून प्रशासनाकडून मतदानाची सर्व तयारी पूर्ण झाली आहे. मतदान केंद्रांवर होणारी संभाव्य गर्दी आणि सुरक्षेचा विचार करून पुणे वाहतूक पोलिसांनी शहराच्या विविध भागांतील वाहतूक रचनेत मोठे फेरबदल केले असून हे बदल १४ ते १६ जानेवारी या कालावधीत लागू राहणार आहेत.

निवडणुकीच्या काळात मतदारांना केंद्रावर पोहोचताना कोणताही अडथळा येऊ नये आणि कायदा-सुव्यवस्था अबाधित राहावी, यासाठी सकाळी ६ ते सायंकाळी ७ या वेळेत पुण्यातील महत्त्वाचे रस्ते वाहतुकीसाठी बंद ठेवण्यात आले आहेत. प्रामुख्याने जड आणि खाजगी वाहनांना या प्रतिबंधित क्षेत्रात प्रवेश दिला जाणार नाही.

हडपसर आणि कोरेगाव पार्क भागात निर्बंध

हडपसर भागात मतदानाची प्रमुख केंद्रे असल्याने साने गुरुजी परिसराकडे जाणारा रस्ता पूर्णपणे बंद असेल. येथील वाहनधारकांनी पर्याय म्हणून माळवाडी डी.पी. रस्ता किंवा अमरधाम स्मशानभूमी मार्गाचा अवलंब करावा. दुसरीकडे, कोरेगाव पार्कमधील व्हीआयपी हालचाली लक्षात घेता नॉर्थ मेन रोड (लेन ‘सी’) आणि बंडगार्डन घाट परिसर बंद राहील. नागरिकांनी प्रवासासाठी कोरेगाव पार्क जंक्शन ते एबीसी फार्म या मुख्य रस्त्याचा वापर करावा.

मध्यवर्ती पेठा आणि विमाननगरमध्ये बदल

समर्थ वाहतूक विभागांतर्गत येणाऱ्या पॉवर हाऊस चौक, संत कबीर चौक आणि रामोशी गेट परिसरातील रस्ते बंद करण्यात आले आहेत. या भागातील प्रवाशांना क्वार्टर गेट आणि सेव्हन लव्हज चौकातून वळवण्यात आले आहे. तसेच, विमाननगरमधील फिनिक्स मॉलचा मागील भाग आणि निको गार्डन परिसरातील रस्ते बंद असून, श्रीकृष्ण हॉटेल आणि दत्त मंदिर चौकातून पर्यायी मार्ग देण्यात आले आहेत.

विश्रामबाग आणि दत्तवाडी परिसरात कडेकोट बंदोबस्त

शहराच्या मध्यवर्ती भागातील पुरम चौक ते टिळक चौक दरम्यानची वाहतूक बंद राहील. नागरिकांनी शास्त्री रस्त्याचा वापर करून दांडेकर पुलामार्गे प्रवास करण्याचे आवाहन करण्यात आले आहे. तसेच, सारसबाग खाऊ गल्ली आणि बाजीराव रस्त्यावरील सनस पुतळा परिसरही वाहतुकीसाठी बंद असेल.

दरम्यान, मतदान प्रक्रिया शांततेत पार पाडण्यासाठी शहरात मोठा पोलीस बंदोबस्त तैनात करण्यात आला असून, नागरिकांनी वाहतुकीच्या नियमांचे पालन करून प्रशासनाला सहकार्य करावे, असं आवाहन वाहतूक पोलिसांनी केलं आहे.