श्रीकृष्ण पांचाळ, पिंपरी- चिंचवड: भाजप नेते आणि आमदार गोपीचंद पडळकर यांनी पिंपरी- चिंचवडमधील जाहीर सभेत राष्ट्रवादी काँग्रेसचे नेते आणि राज्याचे उपमुख्यमंत्री अजित पवार यांच्यासह राष्ट्रवादी शरदचंद्र पवार पक्षाचे आमदार रोहित पवार यांना थेट इशाराच दिला आहे. काका–पुतण्यावर जोरदार हल्लाबोल करत पडळकरांनी आक्रमक भाषेत टीका केली. “मी दहा वर्षांपासून पवारांच्या नादी लागलो आहे, माझं काहीही करू शकले नाहीत. मग महेश लांडगे यांचं काय करणार?” असा सवाल करत त्यांनी अजित पवारांना टोला लगावला. भाजपच्या नादी लागल्यास भर चौकात नंगा करेल, असा इशाराही पडळकरांनी दिला.
पिंपरी-चिंचवड महापालिकेबाबत बोलताना पडळकर म्हणाले, “ही महापालिका सोन्याच अंडं देणारी कोंबडी आहे. विरोधकांना ही कोंबडी कापायची आहे, म्हणूनच ते वारंवार पिंपरी-चिंचवडमध्ये येत आहेत आणि आमदार महेश लांडगे यांच्यावर टीका करत आहेत. महेश लांडगे हे वाघ आहेत. पंजा मारला, तर कार्यक्रम होईल,” असा इशाराही पडळकर यांनी दिला.
पडळकर पुढे म्हणाले, “गेल्या ४० वर्षांत विरोधकांनी जो विकास केला नाही, तो नऊ वर्षांत देवेंद्र फडणवीस आणि महेश लांडगे यांनी केला आहे. त्यामुळे आता विरोधकांनी उगाच वल्गना करू नयेत.” रोहित पवारांवर पुन्हा हल्ला चढवत ते म्हणाले, “महेश लांडगे हे सोन्याचा चमचा घेऊन जन्माला आलेले नाहीत. ते घराणेशाहीतले नाहीत, तर इथल्या मातीतले, जनतेतून घडलेले नेते आहेत.”
अजित पवारांवर गंभीर आरोप करत पडळकर म्हणाले, “अजित पवारांची छाती फाडली तर १०–१५ कारखाने ढापलेले निघतील. पुणे आणि पिंपरी-चिंचवडमधील अनेक सातबारे त्यांच्या नावावर निघतील. अनेक भ्रष्टाचाराची प्रकरणं बाहेर येतील. त्यामुळे महेश लांडगे यांच्या नादी लागू नये. महेश लांडगे हे पैलवान आहेत. कुठल्या क्षणी कुठला डाव टाकतील, सांगता येत नाही. ते अपक्ष म्हणून निवडून आलेले आहेत. आम्ही त्यांना नेता केलं असं म्हणतात, मग तुमचा मुलगा नेता का झाला नाही?” असा सवालही पडळकरांनी उपस्थित केला.
राष्ट्रवादी काँग्रेसवर टीका करत ते म्हणाले, “एक्सपायरी डेट जवळ आलेल्या राष्ट्रवादीच्या नादी लागू नका. २०२९ पर्यंत पक्ष टिकेल की नाही याची शंका आहे. देवेंद्र फडणवीस यांच्यामुळेच अजित पवारांना सन्मानाची खुर्ची मिळाली असून ती नीट सांभाळा, उगाच भाजपच्या नादी लागू नका,” असा टोला पडळकरांनी लगावला.