नितेश राणे यांचे मुंबईतील शासकीय निवासस्थान ‘सुवर्णगड’ बंगल्याबाहेर ही बेवारस बॅग सापडली असल्याची माहिती आहे. त्यांच्या बंगल्याशेजारीच एकनाथ शिंदे यांच्या शिवसेनेचे बाळासाहेब भवन आणि मंत्री जयकुमार गोरे यांचा बंगला देखील आहे. त्यामुळे या परिसरात भीतीचे वातावरण निर्माण झाले आहे. या घटनेची माहिती मिळताच बंगल्याबाहेर मोठा पोलीस बंदोबस्त तैनात करण्यात आला असून, संपूर्ण परिसर सील करण्यात आला आहे.

बॉम्ब शोधक पथकाकडून बॅगची तपासणी सुरू आहे. घटनास्थळी येण्या-जाण्यास बंदी घालण्यात आली आहे. या घटनेचा सीसीटीव्ही व्हिडीओ समोर आला आहे. ज्यामध्ये ब्राऊन कलरचा टी-शर्ट, ब्लॅक कलरचे जॅकेट आणि पँट घातलेला एक तरुण हातामध्ये ही ब्लॅक कलरची ट्रॉली बॅग घेऊन येताना दिसत आहे. हा तरुण नितेश राणे यांच्या बंगल्याजवळ येतो आणि तो त्याठिकाणी ही बॅग सोडून निघून जातो, असंही सीसीटीव्ही फुटेजमध्ये दिसत आहे.

या बॅगसोबत एक चिठ्ठी ठेवण्यात आली आहे. बॅगमध्ये ठेवलेले बूट आणि कपडे हे तुम्ही घेऊ शकता, असे या चिठ्ठीत लिहिलेले आहे.
Thackeray Brother: ठाकरे बंधूंची आज ऐतिहासिक सभा, भाजपकडूनही मोठ्या घोषणांची शक्यता; मुंबईत आज काय-काय घडणार?
मागील काही दिवसांपासून नितेश राणे आक्रमकपणे हिंदुत्वाची भूमिका मांडत आहेत. नितेश राणेंची आज छत्रपती संभाजी नगरमध्ये जाहीर सभा होणार आहे. त्यापूर्वीच त्यांच्या बंगल्याबाहेर ही बेवारस बॅग सापडल्याने या घटनेला अधिक महत्त्व प्राप्त झाले आहे.

मंत्र्यांच्या शासकीय बंगल्याबाहेर अशाप्रकारे बेवारस बॅग ठेवल्याच्या घटना होत असतील तर ही अतिशय गंभीर बाब आहे. पोलीस सध्या सीसीटीव्ही व्हिडीओद्वारे त्यामध्ये दिसणारी व्यक्ती कोण आहे, याचा शोध घेत आहेत. ही बॅग त्याने इथे का आणून ठेवली? याचा देखील पोलीस तपास करत आहेत. आता पोलिसांच्या तपासणीत नेमके काय समोर येणार, हे पाहणे महत्त्वाचे ठरणार आहे.