मुंबई महापालिका निवडणुकीचा प्रचार रंगायला सुरुवात झाली असताना उद्धव ठाकरे आणि राज ठाकरे यांनी निवडणुकीच्या प्रचार रणनीतीत मोठा बदल केला आहे. जाहीर सभा घेऊन प्रचाराची राळ उडवून देण्याऐवजी ठाकरे बंधूंनी यावेळी शाखाभेटींद्वारे प्रत्येक शिवसैनिक, मनसैनिक आणि सामान्य मुंबईकरांपर्यंत पोहोचण्याचे ठरवले आहे. जाहीर सभा आणि जाहीर प्रचारात वेळ न दवडता शाखा-शाखांवर जाऊन लोकांशी थेट संवाद साधण्याचा नवा पॅटर्न त्यांनी सुरू केला आहे.

शाखांमध्ये भेटी देऊन तेथील संबंधित पदाधिकाऱ्यांना पाठबळ देणे, कोणत्याही आमिषांना बळी न पडता पक्षाचे निष्ठेने काम करणे अशा सूचना पदाधिकाऱ्यांना देण्यात येत आहे. यातून कार्यकर्त्यांचे मनोबल वाढावे, असा या दोन्ही नेत्यांचा प्रयत्न असल्याचे समजते.
Ravindra Chavan : कोरियन फूड कुठे मिळेल? चव्हाणांचा पायलट जेवण शोधत गेला, येताना भाजपच्याच सभेच्या गर्दीत अडकला, शेवटी…
नव्या पॅटर्ननुसार उद्धव ठाकरे यांनी मंगळवारी, ६ जानेवारीला अंधेरी पूर्व, जोगेश्वरी तसेच दिंडोशी येथील शाखांना भेटी दिल्या. ७ जानेवारीला दादर माहीम, धारावी, चेंबूर, कुर्ला येथे तर ८ जानेवारीला वर्सोवा, कलिना, गोरेगाव येथील शाखांना ते भेटी देणार आहेत. ९ जानेवारीला उद्धव आणि राज ठाकरे यांची नाशिकमध्ये संयुक्त सभा होणार आहे. त्यानंतर १० जानेवारीला त्यांची संभाजीनगरमध्ये जाहीर सभा होईल. ११ किंवा १२ जानेवारीला शिवाजी पार्क येथे उद्धव-राज ठाकरेंची संयुक्त सभा होणार असल्याची माहिती शिवसेना उबाठा पक्षाचे नेते संजय राऊत यांनी दिली. प्रचारासाठी फारच कमी वेळ असल्याने ठाकरे हे पदाधिकाऱ्यांना मार्गदर्शन करीत आहेत.
Maharashtra Politics : ‘बिनविरोध’ नगरसेवकांबाबत निवडणूक आयोगाचं मोठं स्पष्टीकरण, ‘नोटा’चा पर्याय देत मतदान घेण्याच्या मागणीवर उत्तर
ठाकरे बंधूंनी बदललेल्या रणनीतीवर भाजपने टीका केली आहे. मुंबईच्या सभांना गर्दी होणार नाही, या भीतीपोटी ठाकरे बंधू जाहीर सभा टाळत असल्याचा टोला भाजपने लगावला. ठाकरे बंधूंनी आधी ९ संयुक्त सभा घेण्याचे नियोजन केले होते. ती संख्या नंतर ७ पर्यंत खाली आणली होती. आता, तर एकच संयुक्त सभा होणार असल्याचे समजते, असेही भाजपने म्हटले आहे. त्यांच्या सभांना गर्दी जमा होते, पण मते मिळत नाहीत, असा टोलाही भाजपने लगावला आहे.