नेमकी भानगड काय?

१ एप्रिल २०१९ पूर्वी नोंदणी झालेल्या सर्व जुन्या वाहनांना हाय सिक्युरिटी नंबर प्लेट बसवणे बंधनकारक करण्यात आले होते. सरकारने अनेकदा मुदतवाढ देऊनही लाखो वाहनधारकांनी याकडे दुर्लक्ष केले. मात्र, आता सरकारचे ‘वेट अँड वॉच’ धोरण संपले आहे. ज्यांनी ३१ डिसेंबरपर्यंत अपॉइंटमेंट घेतली नाही, त्यांच्यासाठी नवीन वर्षाची सुरुवात दंडाच्या दणक्याने होऊ शकते.

तुमच्या खिशाला किती फटका बसणार?

• पहिली वेळ: जर तुम्ही पहिल्यांदाच पकडले गेलात, तर १,००० रुपयांचा दंड ठोठावला जाईल.
• दुसरी वेळ: जर तुम्ही नियमाचे उल्लंघन सुरूच ठेवले, तर हा दंड ५,००० ते १०,००० रुपयांपर्यंत जाऊ शकतो.
• सर्वात महत्त्वाचे: ज्या गाड्यांवर एचएसआरपी नसेल, त्यांना आरटीओचे महत्त्वाचे काम (उदा. मालकी हस्तांतरण, पासिंग किंवा फिटनेस प्रमाणपत्र) करता येणार नाही.

Nashik Election: ‘कसा निवडून येतो बघतोच मी…’; नाशिकच्या मिसळीपेक्षा भाजपचा राडाच जास्त झणझणीत! पक्षाच्या दोन उमेदवारांची निवडणूक कार्यालयातच हाणामारी

आता पुढे काय करायचे?

डेडलाईन संपली असली तरी घाबरून जाण्याचे कारण नाही, पण आळस करणे मात्र महागात पडेल.
१. तातडीने महाराष्ट्र परिवहन विभागाच्या अधिकृत पोर्टलवर (transport.maharashtra.gov.in) जा.
२. आपल्या वाहनाचा तपशील भरून ऑनलाइन फी भरा आणि ‘फिटमेंट’साठी अपॉइंटमेंट बुक करा.
३. जर तुमच्याकडे अधिकृत अपॉइंटमेंटची पावती असेल, तर पोलीस तुमच्यावर कारवाई करणार नाहीत.

दरम्यान, ही नंबर प्लेट केवळ फॅन्सी नसून ती तुमच्या वाहनाच्या सुरक्षेसाठी आहे. यात असलेल्या ‘लेझर कोड’मुळे तुमची गाडी चोरीला गेल्यास तिचा शोध घेणे सोपे होते.

त्यामुळे, वाहतूक पोलिसांचा ‘हात’ वर होण्याआधीच आपल्या गाडीला ‘एचएसआरपी’चे कवच चढवून घ्या!