नेमकं प्रकरण काय?

नाशिक रोड परिसरात आयोजित एका कार्यक्रमासाठी भाजप शहराध्यक्ष सुनील केदार उपस्थित होते. यावेळी तिकीट वाटपात डावलले गेलेल्या निष्ठावंत कार्यकर्त्यांनी आणि त्यांच्या समर्थकांनी केदार यांना घेराव घातला. कार्यकर्त्यांचा आरोप आहे की, पक्षासाठी वर्षानुवर्षे काम करणाऱ्या जुन्या कार्यकर्त्यांना बाजूला सारून नवीन किंवा आयात केलेल्या लोकांना महत्त्व दिले जात आहे.

आम्हाला फक्त गाजरच दाखवलं!

कार्यकर्त्यांनी यावेळी आक्रमक घोषणाबाजी केली. “पक्षासाठी आम्ही रक्त आटवायचे आणि संधीची वेळ आली की आम्हाला फक्त गाजर दाखवायचे?” असा संतप्त सवाल कार्यकर्त्यांनी विचारला. हातात खरी गाजरं घेऊन कार्यकर्त्यांनी शहराध्यक्षांचा निषेध केला. कार्यकर्त्यांचा वाढता गोंधळ आणि आक्रमक पवित्रा पाहून सुनील केदारांना तेथून काढता पाय घ्यावा लागला.

Ninad Dixit: संघ मुख्यालयाच्या उंबरठ्यावरच भाजपला आव्हान! 25 वर्षांच्या तरुण स्वयंसेवकाचे बंड; प्रभाग 22 मध्ये नेमकं काय चाललंय?

शहराध्यक्ष सुनील केदारांची भूमिका

या प्रकारानंतर सुनील केदार यांनी माध्यमांशी बोलताना सांगितले की, “सर्व पदाधिकारी आणि कार्यकर्ते यांच्या भावनातीव्र आहेत. आम्ही त्यांच्या सर्व मागण्या आणि भावना लेखी स्वरूपात घेतल्या आहेत. हा सर्व अहवाल लवकरच प्रदेश कार्यालयाकडे पाठवला जाईल. त्यानंतर पक्षाचे वरिष्ठ नेते जो निर्णय घेतील, तो सर्वांना मान्य असेल.”

भाजपसमोर मोठे आव्हान

नाशिकमध्ये भाजपसाठी ही निवडणूक अत्यंत महत्त्वाची आहे, मात्र उमेदवारी अर्जांच्या घोषणेपूर्वीच पक्षात मोठी फूट पडताना दिसत आहे. निष्ठावंत कार्यकर्ते जर निवडणुकीत सक्रिय राहिले नाहीत, तर त्याचा मोठा फटका भाजपलाबसू शकतो.

आता भाजपचे वरिष्ठ नेते या नाराजी नाट्यावर काय तोडगा काढतात आणि डॅमेज कंट्रोलकसं करतात, याकडे सर्वांचे लक्ष लागले आहे.