याबाबतची सविस्तर माहिती अशी की, मुलचेरा तालुक्यातील कांचनपूर येथे १९ जून २०१७ रोजी पीडित महिला तीन वर्षाच्या मुलासह घरात होती. तिचा पती उदरनिर्वाहासाठी आंध्र प्रदेशात गेला होता. हीच संधी साधून शेजारी असलेल्या संजू सरकार हा मध्यरात्री त्यांच्या घरात शिरला. त्याने विवाहितेवर बलात्कार केला. मात्र नंतर आईजवळ झोपलेल्या तीन वर्षांच्या बालकाला जाग आली आणि तो रडायला लागला. मात्र त्याचं रडणं थांबविण्यासाठी संजू याने मुलाचे नाक आणि तोंड दाबून ठार मारलं.

पीडितेने मुलाला वाचवण्याचा प्रयत्न केला असता आरोपीने तिच्याही गळ्यावर चाकूने वार केले होते. दुसऱ्या दिवशी घराचे दार बंद दिसल्याने गावकऱ्यांचा संशय बळावला. घरात डोकावून पाहिले असता महिला रक्ताच्या थारोळ्यात पडून होती तर मुलाचा मृतदेह दिसून आला. महिलेला तातडीने रुग्णालयात दाखल करण्यात आलं. याबाबतची माहिती मिळताच पोलिसांनी तातडीने आरोपीचा शोध सुरू केला होता. पोलिसांनी तपासाची चक्रे फिरवत आरोपीला शोधून अटक केली.

दरम्यान, अहेरीच्या अतिरिक्त सत्र न्यायालयाचे न्यायाधीश प्रकाश आर. कदम यांच्यासमोर या संपूर्ण प्रकरणाची सुनावणी झाली. त्यावेळी तत्कालीन तपास अधिकारी तथा अहेरीचे उपविभागीय पोलिस अधिकारी गजानन टोम्पे यांनी सादर केलेल्या पुराव्यानंतर न्यायालयाने आरोपीला भारतीय दंड विधान कलम ३०२ अंतर्गत फाशीची शिक्षा सुनावली. तसंच बलात्कार आणि खुनाचा प्रयत्न केल्याबद्दल जन्मठेप आणि घरफोडीसाठी दहा वर्षांच्या सश्रम कारावासाची शिक्षा ठोठावली. न्यायालयाने नराधम आरोपीला कठोर शिक्षा सुनावल्याने सर्वसामान्यांकडून समाधान व्यक्त केलं जात आहे.