मुंबईत दिवसा उष्ण, रात्री गारवा

मुंबईत सोमवारी रात्री तापमानाचा पारा 16.9 अंशावर पोहोचला होता. त्यामुळे रात्रीच्या वेळी आणि पहाटेपर्यंत मुंबईत गारठा होता. रात्री गारवा असला तरी दिवसा मात्र वातावरण उष्ण राहणार असल्याचा अंदाज हवामान खात्याने वर्तवला आहे. दिवसा मुंबईतील तापमान 34 अंशापर्यंत जाण्याची शक्यता आहे. पुढील जवळपास आठवडाभर 16 ते 21 डिसेंबर या काळात मुंबईत आकाश निरभ्र आणि हवामान कोरडं राहण्याचा अंदाज आहे. दुसरीकडे मुंबईचा AQI अर्थात एअर क्वालिटी इंडेक्स सुधारला आहे. मुंबईचा एअर क्वालिटी इंडेक्स 111 वर पोहोचला असून हा AQI मध्यम श्रेणीत येतो.
Navi Mumbai News : अत्याधुनिक डिझाइन, 100 कोटी खर्च…नवी मुंबईत नवं रेल्वे स्थानक, प्रवाशांची मोठी सुविधा, कसं-कुठे आहे स्टेशन?

इतर शहरांच्या तुलनेत मुंबईत थंडीचा जोर ओसरला

आज 16 डिसेंबर रोजी दिवसा कमाल तापमान 34 अंशावर, तर किमान तापमान 18 अंश इतकं असेल. 17 डिसेंबर, दुसऱ्या दिवशी उद्या मुंबईत कमाल तापमान 34 अंशांपर्यंत, तर किमान तापमान 19 अंशापर्यंत असेल, असा अंदाज हवामान खात्याने दिला आहे. राज्यभरातील अनेक शहरात तापमानाचा पारा कमालीचा खाली गेला असला, तरी तुलनेने मुंबईत मात्र आता थंडी काही प्रमाणात कमी होत असल्याचं चित्र आहे.

राज्यभरात आणखी काही काळ गारठा राहणार

दरम्यान, परभणी, धुळे, निफाड, पुणे, नाशिक, अहिल्यानगर या भागात तापमानाचा पारा 10 अंशाहून खाली गेला आहे. राज्यभरात किमान तापमानात चढ-उतार होत आहेत. मात्र राज्यभरात गारठा आणखी काही दिवस कायम राहणार असल्याची शक्यता हवामान खात्याकडून वर्तवण्यात आली आहे.