प्रतीक्षा भोसले असे आत्महत्या केलेल्या विवाहितेचे नाव आहे. विशेष म्हणजे तिला एक मुलगी आहे, मात्र दुसरा मुलगा व्हावा यासाठी तिचा छळ सुरु होता. आईच्या आत्महत्येमुळे मुलीचं मातृछत्र हरवल्यामुळे सर्वत्र हळहळ व्यक्त केली जात आहे. या प्रकरणात पतीसह चार जणांविरुद्ध विमानतळ पोलिसात गुन्हा दाखल करण्यात आला आहे.

काय आहे प्रकरण?

मयत विवाहिता प्रतीक्षा भोसले हिचे वडील राजेश्वर श्रीराम वानखेडे यांनी या प्रकरणात तक्रार दिली आहे. त्यांची मुलगी प्रतीक्षा हिचा विवाह २०२३ मध्ये लक्ष्मण भोसले याच्याशी लावून देण्यात आला होता. त्यावेळी लग्नात साडेचार लाख रुपये हुंडा देण्यात आला होता. काही दिवस प्रतीक्षाला सासरच्या मंडळींनी चांगले नांदवले, परंतु त्यानंतर मात्र पती लक्ष्मण भोसले हा दारुच्या नशेत दररोज तिला मारहाण करीत होता. तसेच नणंद माधुरी किशोर देशमुख, दीपाली रामराव देशमुख आणि भाग्यश्री सूरज देशमुख या फोनवरून शिवीगाळ करीत होत्या.

प्रतीक्षा यांना पहिली मुलगी झाल्यानंतर तर मुलगा हवा म्हणून त्रास वाढतच गेला. त्यातच स्कूल व्हॅन घेण्यासाठी पाच लाख रुपयांची मागणी करण्यात आली. ५० हजार रुपये देऊनही त्यांचे समाधान झाले नाही. दरम्यान प्रतीक्षा दुसऱ्यांदा गर्भवती राहिल्यानंतर मारहाणीमुळे तिचा गर्भपात झाला होता. परंतु, पती आणि नणंदेच्या वागणुकीत बदल झाला नाही.

मुलगा पाहिजे म्हणून सातत्याने त्रास सुरु होता, अखेर या त्रासाला कंटाळून प्रतीक्षाने २५ नोव्हेंबर रोजी गळफास घेऊन आत्महत्या केली. या प्रकरणी लक्ष्मण शंकरराव भोसले, माधुरी किशोर देशमुख, दीपाली रामराव देशमुख आणि भाग्यश्री सूरज देशमुख यांच्या विरोधात गुन्हा नोंद झाला आहे. आईच्या मृत्यूनंतर चिमुकलीचे मातृत्व प्रेम हरवलं आहे. या घटनेने हळहळ व्यक्त होत आहे.