मेरा बुद्रुक येथील ३५ वर्षीय बाळू समाधान पैठणे यांच्याकडे दोन ट्रॅक्टर आहेत. सध्या शेतीची कामे मोठ्या प्रमाणावर सुरू असल्याने ट्रॅक्टर मालकांना धावपळ करावी लागत आहे. २६ नोव्हेंबर रोजी सायंकाळी बाळू पैठणे ट्रॅक्टरसाठी डिझेल आणायला साखरखेर्डा येथे गेले होते. त्यांनी आपल्या मोटरसायकलवर डिझेलचे दोन ४० लिटरचे कॅन घेतले होते. साखरखेर्डा येथून डिझेल भरून मेरा बुद्रुककडे परत येत असताना, शिंदी आणि मेरा बुद्रुक दरम्यान खरात यांच्या गोठ्याजवळ एका अज्ञात वाहनाने त्यांच्या मोटरसायकलला जोरदार धडक दिली. या धडकेत बाळू पैठणे गंभीर जखमी झाले. रस्त्यावरून जाणाऱ्या प्रवाशांनी त्यांना पाहिले आणि तातडीने नातेवाईकांना बोलावून चिखली येथील जंजाळ रुग्णालयात दाखल केले. मात्र, उपचारादरम्यान त्यांचा मृत्यू झाला.
बुलढाण्यात ZP शाळेच्या मुख्याध्यापकाचा धिंगाणा; प्रार्थनेवेळीच मद्यपान करुन तर्राट, तडकाफडकी निलंबित
या घटनेमुळे मेरा बुद्रुक गावात हळहळ व्यक्त होत आहे. शेतातील कामांची धावपळ, वेळेची कमतरता आणि हिवाळ्यामुळे लवकर मावळणारा दिवस यामुळे शेतकरी कामांची लगबग करत आहेत. अशा परिस्थितीत, डिझेल आणून पुन्हा शेतीची कामे नियमित करण्याच्या विचारात असतानाच हा दुर्दैवी अपघात घडल्याचे बोलले जात आहे. यामुळे परिसरात शोककळा पसरली असून पैठणे कुटुंबावर दु:खाचा डोंगर कोसळला आहे. मेहनती व प्रामाणिक म्हणून त्याची ओळख होती. शेतीच्या हंगामात दिवस-रात्र कष्ट करणाऱ्या या तरुण शेतकऱ्याचा अकस्मात मृत्यू झाल्याने गावात संतापाची भावना आहे. दरम्यान, अज्ञात वाहनचालकाचा शोध घेण्यासाठी पोलिसांनी तपास सुरू केला असून जवळील सीसीटीव्ही फुटेजचीही तपासणी सुरू आहे.