नंदुरबार जिल्ह्यातील शहादा नगर परिषदेची निवडणूक ही सध्या चर्चेत आहे. या निवडणुकीत नगराध्यक्षपदासाठी एकूण 6 उमेदवार आहेत. त्यापैकी 4 उमेदवार हे मुस्लिम समाजातील आहेत. त्यामुळे मतांचे धुव्रीकरण झाले तर कुणाला फायदा होणार? ते पाहणं आता महत्त्वाचं आहे.
शहादा नगरपालिकेसाठी भाजपातर्फे मकरंद पाटील, जनता विकास आघाडीतर्फे अभिजित पाटील, राष्ट्रवादी काँग्रेस पक्षाचे खाटीक मकसूद शेख गफ्फार, एआयएमआयएम पक्षाचे पिंजारी साजिद रहीम, तर दोन अपक्ष उमेदवार पिंजारी शेख आरिफ शेख मासुम आणि बेलदार मेहमूद शेख अहमद असे 6 उमेदवार नगराध्यक्षपदासाठी तर नगरसेवकांच्या २९ जागांसाठी ११९ उमेदवार मैदानात उतरले आहे.
नगराध्यक्षपदाचे दोन प्रबळ दावेदार पारंपरिक विरोधक भाजपचे मकरंद पाटील आणि जनता विकास आघाडीचे अभिजित पाटील यांच्यात प्रमुख लढत होत असल्याचे वाटत असतानाच राष्ट्रवादी काँग्रेस (अजित पवार) पक्षाचे खाटीक मकसूद शेख गफ्फार आणि एआयएमआयएम पक्षाचे पिंजारी साजिद रहीम यांच्या उमेदवारीमुळे शहाद्यातील राजकीय गणित बदलली आहेत. तसेच चार मुस्लिम उमेदवार कोणाच्या मतांवर किती प्रभाव टाकतात? की त्यातीलच कुणी मागील निवडणुकीप्रमाणे प्रभावी ठरतो, यावरून या निवडणुकीचे अंतिम भवितव्य ठरणार आहे.
सुमारे 58 हजार 972 मतदार असून, त्यात 38 टक्के अर्थात म्हणजेच सुमारे 23 हजार मुस्लीम समुदायाचे मतदार आहेत. मुस्लीम समुदायाचे मतदान निवडणुकीत मोठा प्रभाव टाकणारे आणि निर्णायक ठरत आले आहेत. 2016 च्या निवडणुकीत मुस्लीम समुदायाचे मतदान पारंपरिकरीत्या काँग्रेस पक्षाकडे वळणार आणि काँग्रेस पक्षाच्या उमेदवाराचा विजय होईल असे वाटत होते. मात्र तसे न होता, त्यावेळी कमालीचे धार्मिक ध्रुवीकरण होऊन हे मतदान एकगठ्ठा नगराध्यक्षपदाचे अपक्ष उमेदवार शेख जहीर शेख मुशीर यांना गेल्याने काँग्रेस पक्षाच्या उमेदवाराचा पराभव होऊन काँग्रेस पक्ष तीन नंबरवर फेकला गेला होता. तर भाजपच्या उमेदवाराचा विजय झाला होता.
मुस्लीम समुदायाचे अपक्ष उमेदवार शेख जहीर शेख यांचा यावेळी निसटता पराभव झाला असला तरी ते दोन नंबरवर राहिले होते. यंदाच्या निवडणुकीत भाजप आणि जनता विकास आघाडीच्या उमेदवारांसमोर मुस्लिम समुदायाचे चार उमेदवार उभे ठाकले आहेत. हे चारही उमेदवार कोणत्या उमेदवारावर प्रभाव टाकणार? की मागील निवडणुकीप्रमाणे धार्मिक ध्रुवीकरण होऊन हे मतदान एकगठ्ठा कुणाला तरी जाणार? याबाबत तर्कवितर्क लावले जात आहेत.
राज्यात सत्तेत, पण नंदुरबारमध्ये महायुतीत कमालीचा राजकीय संघर्ष, नगर परिषद निवडणुकीत 2 आमदारांची प्रतिष्ठा पणाला
एक गोष्ट मात्र निश्चित आहे की, शहादाच्या नगराध्यक्षपदाच्या प्रतिष्ठेच्या आणि चुरशीच्या लढतीत मुस्लीम समुदायाची मते प्रभावी ठरणार, हे मात्र निश्चित आहे. ही मते यंदा कोणाच्या पारड्यात जाणार, याबाबत शहरात चर्चा आहे. दरम्यान शिंदे शिवसेनेच्या नेत्यांनी जनता विकास आघाडीला पाठिंबा दिला आहे.
दिग्गज नेत्यांच्या पत्नीच्या लढतीकडे जिल्हावासियांचे लक्ष
शहादा नगरपालिका निवडणुकीत प्रभाग क्रमांक १३ – अ या महिला ओबीसी आरक्षित जागेसाठीची लढत शहरात महत्त्वाची ठरणार आहे. या जागेसाठी भाजपचे नगराध्यक्षपदाचे उमेदवार मकरंद पाटील यांच्या पत्नी माधवी मकरंद पाटील आणि जनता विकास आघाडीचे नगराध्यक्ष पदाचे उमेदवार अभिजित पाटील यांच्या पत्नी प्रीती अभिजित पाटील हे आमनेसामने लढत देत आहेत. नगराध्यक्षपदाएवढी महत्त्वाची ही लढत ठरणार आहे. या लढतीकडे जिल्हावासियांचे लक्ष लागून आहे.
लेखकाबद्दलचेतन पाटील“चेतन पाटील हे पत्रकार आहेत. त्यांना राजकीय, सामाजिक, शैक्षणिक, मनोरंजन आणि क्रीडा अशा विविध बीटच्या बातम्या केल्याचा अनुभव आहे. चेतन पाटील यांनी दैनिक लोकमत, न्यूज 24, जय महाराष्ट्र, आपलं महानगर, न्यूज 18 लोकमत, टीव्ही 9 मराठी अशा विविध वृत्त संस्थांमध्ये काम केल्याचा अनुभव आहे. चेतन हे जवळपास 8 वर्षांपेक्षा अधिकचा काळ माध्यम क्षेत्रात कार्यरत आहेत. त्यांनी कल्याणच्या नामांकित बिर्ला महाविद्यालयातून पत्रकारितेतील पदवी शिक्षण घेतलं आहे. त्यांना पदवीचं शिक्षण घेत असताना एका पॉलिटीकल पीआर कंपनीसोबत काम करण्याचा अनुभव आहे. सध्या ते महाराष्ट्र टाइम्स ऑनलाईन येथे कार्यरत आहेत.
चेतन पाटील यांनी केलेल्या बातमीमुळे एका निराधार वृद्ध महिलेला खूप मोठी मदत झाली. याशिवाय चेतन पाटील यांनी लिहिलेल्या अनेक बातम्यांचा पॉझिटिव्ह इम्पॅक्ट पडलेला बघायला मिळाला आहे.
चेतन पाटील महाविद्यालयात शिक्षण घेत असताना त्यांच्या ‘भगतसिंग’ कवितेची निवड अखिल भारतीय मराठी साहित्य संमेलनाच्या कवीकट्टा सदरात वाचनासाठी झाली होती. चेतन पाटील यांनी नाटकातही काम केलं आहे. त्यांनी राज्य नाट्य हौशी स्पर्धेत भाग घेतलाय. त्यांनी ‘जलरंग तापी’ नाट्य संस्थेसोबत काम करत असताना ‘नटसम्राट’ नाटकात बूटपॉलिश करणाऱ्या राजाची भूमिका साकारली होती. त्यांची ही भूमिका प्रचंड भाव खाऊन गेली होती. त्यांच्या अभिनयाने प्रभावित होऊन एका प्रेक्षकाने त्यांना खांद्यावर उचलून घेत नृत्य केलं होतं.
खूप छोट्या गोष्टींमधून आनंद शोधावा, असं त्यांचं मत आहे. त्यांना पत्रकारितेसह वाचन, लेखनाची आवड आहे. चेतन पाटील यांचं आतापर्यंतचं वैयक्तिक आयुष्य खूप संघर्षमय आणि खडतर असल्यामुळे ते फार संवेदनशील आहेत. त्यामुळे संवेदनशील बातम्या हाताळताना ते अशा बातम्यांना न्याय देण्याचा पूरेपूर प्रयत्न करतात.”… आणखी वाचा