2023 पासून या “जुगाडाला” सुरूवात झाली आहे. यूटीएस नावाच्या अॅपच्या माध्यमातून नागरिकांना ऑनलाईन लोकल तिकीट बुक करण्याची सुविधा उपलब्ध आहे. मात्र, या अधिकृत सुविधेचा वापर करण्याऐवजी काही प्रवाशांनी फसवणुकीचा मार्ग स्वीकारला आहे. त्यांनी यूटीएस सीझन पासचे बनावट फोटो तयार करून खोट्या क्यूआर कोडसह फेक पास बनवायला सुरुवात केली. जुलै 2025 मध्ये पश्चिम रेल्वेच्या अधिकाऱ्यांना पहिला बनावट यूटीएस पास सापडला होता. त्यानंतर नोव्हेंबरपर्यंत अशा घटनांमध्ये मोठी वाढ झाली असून, अनेक प्रवासी अशा प्रकारे फसवणूक करत असल्याचे उघड झाले आहे.

नवी मुंबई विमानतळ उड्डाणांसाठी सज्ज! तिकीट नोंदणी लवकरच होणार सुरू; पाहा कधीपासून आणि कोणत्या विमानसेवा असतील उपलब्ध

मंगळवारची घटना

नुकत्याच घडलेल्या घटनेत मंगळवारी विरार एसी लोकलमध्ये एका प्रवाशाला बनावट तिकीटासह पकडण्यात आले. सायंकाळी साडेसातच्या सुमारास नायगाव स्टेशनवर टीसी तिकिटांची तपासणी करत असताना एका व्यक्तीने यूटीएस अॅपवर घेतलेले तिकीट दाखवले. सुरुवातीला अधिकाऱ्याला ते तिकीट खरे वाटले, मात्र नंतर क्यूआर कोडमध्ये काही त्रुटी दिसून आल्या. वेरीफिकेशन डिव्हाइसवर तपासणी केली असता ते तिकीट रेल्वेच्या प्रणालीमध्ये अस्तित्वातच नसल्याचे स्पष्ट झाले. अधिकाऱ्यांच्या म्हणण्यानुसार, प्रवाशाने जुन्या तिकीटाचा स्क्रीनशॉट घेऊन त्यावर तारीख बदलली होती. त्याच्यावर तत्काळ गुन्हा नोंदवण्यात आला असून, वसई पोलिस ठाण्यात तक्रार दाखल करण्यात आली आहे. यासोबतच त्याच्याकडून दंडही वसूल करण्यात आला आहे.

पश्चिम रेल्वेमध्ये गेल्या दोन वर्षांत यूटीएस अॅपचा वापर करून बनावट तिकिटे दाखवण्याचे प्रकार झपाट्याने वाढत आहेत. विशेषतः एसी लोकलमध्ये अशा घटना सर्वाधिक प्रमाणात घडताना दिसतात. रेल्वे प्रशासनाने याबाबत सतर्कता वाढवण्याचे आदेश दिले असून, तपासणी अधिक कडक करण्यात येणार असल्याचे संकेत मिळाले आहेत.