भलेही राज्यात भाजप व अजित पवारांची राष्ट्रवादी सत्तेत असली तरी बारामतीच्या राजकारणात मात्र या दोस्तीत कुस्ती होण्याची शक्यता आहे. भाजपने काल एकनाथ शिंदे यांच्या ठाण्यातही आपला प्रभारी नेमला, त्या पाठोपाठ अजित पवारांच्या बालेकिल्ल्यातही तगडे नेते देऊन आपल्या कार्यकर्त्यांना दिलासा दिला आहे.

Pune Election : अजित पवार यांना रोखण्यासाठी भाजपची जम्बो कार्यकरणी, ‘या’ चार मातब्बर नेत्यांना उतरवलं रिंगणात
दुसरीकडे, अजित पवारांना आताच नुकतेच महाराष्ट्र ऑलिंपिक असोसिएशनच्या निवडणूकीने घायकुतीला आणलेल्या मुरलीधर मोहोळ यांच्याकडे बारामतीचे प्रभारी व अजित पवारांचे पुर्वीचे कार्यकर्ते मात्र आता भाजपच्या गळ्यातील ताईत असलेले राहूल कुल यांची बारामतीच्या प्रमुखपदी निवड करण्यात आली आहे.

एकंदरीत राहूल कुल यांच्या दौंड तालुक्यात भाजपमधील काही प्रमुख नेते अजित पवारांच्या पक्षात काही दिवसांपूर्वीच प्रवेश करते झाल्यानंतर दुखावलेल्या राहूल कुल यांच्या माध्यमातून भाजप अजित पवारांवर नथीतून तीर मारण्याच्या तयारीत आहे. राहूल कुल यांना ताकद देत बारामतीतील नाराजांना भाजपमध्ये घेण्यासाठी भाजपने या दोघांची निवड केली आहे. अजित पवार महायुतीत सहभागी झाल्यानंतर त्यांना अगोदर विरोध करणारे भाजपचे स्थानिक कार्यकर्ते, पदाधिकारी गलितगात्र झाले आहेत.

या मरगळ आलेल्या संघटनेला पुन्हा उभारी देण्यासाठी भाजपने हा नवा खेळ खेळला आहे. भाजपच्या या व्यूहनितीत जुने सहकारी पुन्हा तग धरणार का आणि नवे सहकारी भाजपकडे येणार का हे येणारा काळ सांगेल. ‘मात्र, राज्यात जरी एकत्र असलो, तरी राजकारण आमच्या नितीप्रमाणेच चालेल,’ असा इशारा भाजपने दिला आहे.

बारामतीत तूर्ततरी अजित पवारांचाच शब्द प्रमाण असेल, मात्र हा गड हलवून त्याला हादरे देण्यासाठी भाजपनेही प्रयत्न सुरू केला आहे, त्यातूनच राष्ट्रवादीतील नाराजांना चुचकारून त्यांना आपल्या कळपात घेत भाजपची ताकद वाढवून लोकसभेसाठी बळकटी आणण्याचा हा भाजपचा दूरदृष्टीकोन आहे.