भगवंत मान यांच्यासोबत झालेल्या संभाषणाबाबतची माहिती सुप्रिया सुळे यांनी आपल्या सोशल मीडिया अकाऊंटवरून दिली आहे. “महाराष्ट्र केसरी पैलवान सिकंदर शेख यांच्या प्रकरणासंदर्भात माझे आणि आमदार रोहित पवार यांचे पंजाबचे मुख्यमंत्री भगवंत मान यांच्यासोबत बोलणे झाले आहे. मुख्यमंत्र्यांनी याबाबत सर्व माहिती घेऊन आज दुपारपर्यंत आम्हाला कळवण्याचे आश्वासन दिलं आहे,” असं खासदार सुळे यांनी सांगितलं.

रोहित पवार नेमकं काय म्हणाले?

सिकंदर शेख याच्यावर झालेल्या कारवाईबाबत शंका उपस्थित करत रोहित पवारांनी सिकंदरला अडकवले जाण्याचा प्रयत्न होऊ शकतो, असा आरोप केला आहे. “सिकंदर शेख हा एक गुणी पैलवान असून त्याने आतापर्यंत फक्त त्याच्या गुणवत्तेवरच कुस्ती क्षेत्रात स्वतःचं एक स्वतंत्र स्थान निर्माण केलं आहे. कुस्ती सोडून गुन्हेगारी क्षेत्रात तो जाईल, यावर आमचा बिलकूल विश्वास नाही, कदाचित कुस्तीत त्याची होत असलेली प्रगती पाहून कोणीतरी त्याला जाणीवपूर्वक अडकवण्याचा प्रयत्न करू शकते. याबाबत महाराष्ट्र सरकारने पंजाब सरकारशी बोलून सिकंदरवर कोणताही अन्याय होणार नाही, याची काळजी घ्यावी. अन्यथा चुकीच्या पद्धतीने त्याला अडकवल्यास लंबी रेस का घोडा असलेल्या एका मराठी पैलवानावर ते अन्याय करणारं ठरेल. यासंदर्भात सुप्रियाताईंच्या माध्यमातून पंजाब सरकारशी बोलण्याचा प्रयत्न सुरू असून यातून सकारात्मक मार्ग निघेल,” असा विश्वास रोहित पवारांनी व्यक्त केला होता.

काय आहे प्रकरण?

सोलापुरातील मोहोळ तालुक्यातील रहिवासी असलेल सिकंदर शेख याच्यासह एकूण चौघांना सीआयए पथकाने शस्त्र तस्करी प्रकरणात मोहाली येथून नुकतीच अटक केली. सिकंदरला एकीकडे कुस्तीत अभूतपूर्व यश मिळालेलं असतानाच, दुसरीकडे अवैध शस्त्र तस्करी प्रकरणात अटक झाल्यामुळे कुस्ती क्षेत्राला जबरदस्त हादरा बसला आहे. हरियाणा आणि राजस्थानात कुख्यात असेलेल्या पपला गुर्जर टोळीशी त्याचा थेट संबंध असल्याचा पोलिसांना संशय आहे. दानवीर आणि त्याचा साथीदार बंटी हे दोन संशयित 24 ऑक्टोबर रोजी एसयूव्ही गाडीतून दोन शस्त्रे घेऊन मोहालीत आले होते. पुढे ही शस्त्रे सिकंदर शेखकडे देण्याचे ठरले होते आणि संबंधित शस्त्रे कृष्ण ऊर्फ हॅप्पीकडे पुरवण्याची जबाबदारी सिकंदरवर होती, असा आरोप आहे. याप्रकरणी आता पुढे काय होते, सिकंदरवर खरंच अन्याय झाला की त्याचा गुन्हेगारी कृत्यात सहभाग आहे, हे पोलीस तपासानंतरच स्पष्ट होणार आहे.