पुणे जिल्ह्यातील पौडजवळील दारवली गावात एका तरुणाचा मृतदेह आढळला होता. या मृतदेहाची ओळख पडली असून सागर भाऊराव मेश्राम असं मृताचं नाव असल्याचं समोर आलं आहे. हा मृतदे पौडजवळील परमार बंगल्याशेजारी आढळला होता. या बंगल्यात हिंदूराष्ट्रसेनेचे अध्यक्ष धनंजय देसाई राहतात. मृत सागर मेश्राम गोशाळेत गुराखी म्हणून काम करत होता. घटनेने परिसरात खळबळ उडाली असून पोलिसांनी घटनास्थळी पाहणी केली.याबाबतची सविस्तर माहिती अशी की, लोणावळ्याजवळ एका सराईत गुन्हेगाराचा मृतदेह आढळून आल्याने खळबळ उडाली होती. मृतदेहाची ओळख सागर भाऊराव मेश्राम (वय 32, रा. गंगापुरी, वाई, जि. सातारा) अशी असल्याचे पोलीस तपासात स्पष्ट झालं आहे. हा मृतदेह पौडजवळील दारवली गावातील परमार बंगल्याशेजारी शुक्रवारी सकाळी आढळून आला होता. हा बंगला बांधकाम व्यावसायिक विलास परमार यांच्या मालकीचा आहे. मात्र तिथं गेल्या काही वर्षांपासून हिंदू राष्ट्रसेनेचे धनंजय देसाई राहत असल्याचे समजते. सागर मेश्राम याच परिसरात असलेल्या गोशाळेत गुराखी म्हणून काम करत असे. घटनेची माहिती मिळताच पौड पोलिसांनी घटनास्थळी पोहचत पाहणी केली.
तरुण होता सराईत गुन्हेगार
दारवली गावाच्या हद्दीत परमार बंगल्याशेजारी मृतावस्थेत आढळलेला सागर भाऊराव मेश्राम असून हा 32 वर्षीय तरुण मूळचा वाई, जि. सातारा येथील गंगापुरी येथील होता. ज्या बंगल्याशेजारी हा मृतदेह सापडला, तो बंगला बांधकाम व्यावसायिक विलास परमार यांचा असल्याची माहिती पौड पोलिसांनी दिली आहे. सागर मेश्राम हा सराईत गुन्हेगार असल्याचंही सांगितलं जात आहे.
दरम्यान, सध्या सागर मेश्राम हा याच परिसरातील एका गोशाळेत गुराखी म्हणून काम करत असे. मात्र त्याचा मृतदेह शुक्रवारी सकाळी आढळून आल्यामुळे परिसरात मोठी खळबळ उडाली आहे. तरुणाचा मृतदेह आढळून आल्याची माहिती मिळताच पौड पोलीस ठाण्याचे वरिष्ठ निरीक्षक संतोष गिरीगोसावी यांनी तातडीने घटनास्थळी धाव घेतली व पाहणी केली. सागर याचा मृत्यू नेमका कशामुळे झाला आणि त्याची हत्या करण्यात आली का, याबाबत पोलिसांनी पुढील तपास सुरू केला आहे.
