सौजन्य -मटा 

रोजगार मेळ्यात घडलेल्या या संपूर्ण प्रकाराबाबत सुचिता जोशी या महिला अधिकारी विभागांतर्गत तक्रार करणार आहेत. तर दुसरीकडे, सुचिता जोशी यांनी राजशिष्टाचाराचे (प्रोटोकॉल) पालन न करता कार्यक्रमाला उपस्थिती लावल्यावरून शोभा मधाळे यांनी आक्षेप घेतला असल्याची माहिती सूत्रांनी दिली. बदलीच्या आदेशाविरुद्ध मधाळेंनी न्यायालयात धाव घेतली आहे.

बदलीवर स्थगितीचा आदेश हाती आल्यापासून मधाळे या रोज कार्यालयात जात असून विभागाने सुचिता जोशी यांच्याकडचे प्रभारपद कायम ठेवल्याने त्याही जबाबदारी सांभाळत आहेत. मधाळे यांना कार्यभार मिळणे अपेक्षित असलं तरी विभागाच्या दिरंगाईमुळे नागपूरचे पोस्टमास्टर जनरलपद नेमके कुणाकडे याचा तिढा निर्माण झाला आणि त्यातूनच वाद उफाळला.

रोजगार मेळाव्यात नोडल अधिकारी म्हणून पोस्टमास्टर जनरल यांना निमंत्रित करण्यात आलं होतं. त्यानुसार सुचिता जोशी या व्यासपीठावर उपस्थित होत्या. या मंचावर आधी तीन सोफे होते. परंतु थोड्या वेळात एक सोफा हटवण्यात आला. एका सोफ्यावर भाजप नेते आणि केंद्रीय मंत्री गडकरी बसले. तर दुसऱ्या सोफ्यावर सुचिता जोशी होत्या. मात्र शोभा मधाळे या देखील कार्यक्रमाला आल्या आणि मंचावर उपस्थित झाल्या. त्यानंतर जोशी व मधाळे एकाच सोफ्यावर बसल्या.

काही वेळातच सर्वांसमोर दोघींमध्ये धुसफूस सुरू झाली. त्यानंतर मधाळे यांनी जोशी यांच्या हाताला धक्का दिला आणि साडीवर पाणी सांडवले. तसंच त्यांच्या डाव्या हाताला चिमटाही काढला. सुचिता जोशी यांनी स्वतःला कसेबसे सावरण्याचा प्रयत्न केला. मात्र हा सारा प्रकार समोर बसलेल्या सगळ्यांना स्पष्टपणे दिसत होता. विभागातील अन्य अधिकारी व कर्मचाऱ्यांपुढे हे सर्व घडत होते. या सगळ्या प्रकारावर अनेकांकडून नाराजी व्यक्त करण्यात आली. परंतु दोघीही उच्च अधिकारी असल्यामुळे हा वाद मिटवण्यासाठी कुणीही पुढाकार घेतला नाही. या घटनेनंतर तरी आता नागपूरचे पोस्टमास्टर जनरलपद नेमके कुणाकडे आहे, यावर विभाग तातडीने निर्णय घेणार का, हे पाहणं महत्त्वाचं ठरणार आहे.