शिरीष गोरठेकर आणि कैलाश गोरठेकर हे माजी आमदार दिवंगत बापूसाहेब गोरठेकर यांचे सुपुत्र आहेत. नांदेड जिल्ह्याच्या राजकारणात गोरठेकर कुटुंबाचं नाव मोठं असून अनेक दशकापासून राजकीय वर्चस्व राहिलं आहे. दिवंगत बापूसाहेब गोरठेकर यांनी भोकर विधानसभा मतदार संघातून प्रतिनिधित्व केले. माजी मुख्यमंत्री अशोक चव्हाण यांचे कट्टर विरोधक अशी बापूसाहेब गोरठेकर यांची ओळख होती. गोरठेकर परिवारातील तिसरी पिढीत शिरीष गोरठेकर हे उमरी कृषी उत्पन्न बाजार समितीचे सभापती तर कैलाश गोरठेकर हे नांदेड जिल्हा मध्यवर्ती सहकारी बँकेचे संचालक आहेत. दोन्ही गोरठेकर बंधू आता शरद पवार यांची सोडणार असून अजित पवार यांच्या पक्षात प्रवेश करणार आहेत. शनिवारी उपमुख्यमंत्री अजित पवार यांच्या उपस्थितीत ते राष्ट्रवादीत प्रवेश करणार आहेत. यावेळी प्रदेशाध्यक्ष सुनील तटकरे, माजी मंत्री नवाब मलिक, आमदार प्रताप पाटील चिखलीकर यांच्यासह राष्ट्रवादी पक्षाचे इतर नेते उपस्थित राहणार आहेत.

बिहारमध्ये चर्चेत एकनाथ शिंदे, कोणाचे वांदे? शहांनी दिलेले ‘नागरिकशास्त्राचे धडे’ गोत्यात आणणार?

गोरठेकर बंधूंना राष्ट्रवादी पक्षात ओढण्यासाठी स्थानिक पातळीकडून प्रयत्न सुरू होते. अखेर या प्रयत्नाला यश आलं आहे. देगलूरमध्ये हा पक्षप्रवेश सोहळा पार पडणार असून अनेक जण राष्ट्रवादीत प्रवेश करणार आहेत. आगामी स्थानिक स्वराज्य संस्थेच्या निवडणुकीत राष्ट्रवादी पक्षाला कितपत यश मिळेल हे पाहावं लागणार आहे. विशेष बाब म्हणजे उपमुख्यमंत्री अजित पवार यांचा पक्ष प्रवेशाचा हा चौथा दौरा असणार आहे.

दुसरीकडे, राष्ट्रवादी पक्षाने स्थानिक स्वराज्य संस्थेच्या निवडणुकीची तयारी सुरु केली आहे. आमदार प्रताप पाटील चिखलीकर यांनी सर्वच तालुक्यात बैठकीचा धडाका सुरू केला आहे. सर्वच पक्षातील नेत्यांनी निवडणुकीत स्वबळावर लढण्याची तयारी केल्याचे चित्र नांदेडमध्ये पाहायला मिळत आहे.