अजय पांडुरंग बोरकर (वय 23) असे पाण्यात बुडून मृत्यू झालेल्या तरुणाचं नाव आहे. तर ओम सतीश बोरकर (वय 20), अक्षय बाळू शेलार (वय 25) असे बचावलेल्या दोन तरुणांचं नाव आहे. या प्रकरणी स्थानिकांनी दिलेल्या माहितीनुसार ढेकू नदीला गेल्या काही दिवसांपासून पाणी वाढलं आहे. या वाढलेल्या पाण्यात तीन दिवसांपासून काही तरुण पोहण्यासाठी जात होते. दरम्यान वैजापूर तालुक्यातील राहेगाव येथील तीन मित्र पोहण्यासाठी ढेकू नदीत उतरले. तिघेही वाहून जात होते. ही बाब स्थानिकांच्या लक्षात येतच रमेश शेजुळ, एकनाथ मस्के, बळीराम मस्के, मनोज म्हस्के, उमेश शेलार, रामनाथ शेलार यांनी शर्थीचे प्रयत्न करून अक्षय शेलार व ओम बोरकर या दोघांना वाचवले. मात्र उपसरपंचांचा मुलगा असलेला अजय बोरकर पाण्यात वाहून गेला बराच वेळ होऊन तो सापडला नाही.

मुलीच्या भेटीला जाताना कुटुंबावर काळाचा घाला, ट्रकच्या धडकेत पित्यासह धाकट्या बहिणीचा करुण अंत
वाहून गेलेला अजय सापडला नसल्यामुळे स्थानिकांनी तात्काळ ही माहिती मनपाच्या अग्निशामक विभागाला दिली. घटनेची माहिती मिळताच अग्निशामक विभाग तात्काळ घटनास्थळी दाखल झाले. अग्निशामक दलाचे अजय सलाम बात, विशाल गरडे, रितेश कसुरे, कमलेश सलामबाद, विनोद बमने, सचिन शिंदे, रवी दुधे, सचिन फुले, घुगे यांच्या पथकाने शोधकार्य केले. अखेर एक किलोमीटर अंतरावर अजय बोरकर याचा मृतदेह आढळून आला.

दरम्यान, अजय याच्या पश्चात आई-वडील एक लहान बहीण असा परिवार आहे. या घटनेनंतर नातेवाईकांनी टाहो फोडला होता.