मिळालेल्या माहितीनुसार, पनवेल शहर पोलिस ठाण्याच्या हद्दीत स्वप्नालय हे मुलींचे बालगृह असून या बालगृहात विविध गुह्यांतील अल्पवयीन मुली, वेगवेगळ्या कारवायांमधून सुटका झालेल्या अल्पवयीन मुलींना पुनर्वसनाच्या हेतूने ठेवलं जातं. सध्या या बालगृहात ३९ मुली असून यापैकीच १२ ते १७ वयोगटातील पाच मुलींनी रविवारी पहाटे बालगृहातील खिडकीची ग्रील तोडून पलायन केलं. यातील एक मुलगी उरण येथील एका प्रकरणातील पीडित आहे. तर इतर चार मुली या तळोजा, पनवेल व कर्जत येथील विविध पोलिस ठाण्याच्या हद्दीतील असल्याचे समजते.

बालगृहातील पाच मुली पळाल्याची बाब सकाळी उघडकीस आल्यानंतर बालगृहाच्या काळजीवाहक कविता पंडित यांनी बालगृह अधीक्षक, बालकल्याण समितीचे पदाधिकारी तसंच जिल्हा बाल संरक्षण कक्ष अधिकारी यांना फोन करत याबाबतची माहिती दिली. त्यानंतर त्यांनी पनवेल शहर पोलिस ठाण्यात तक्रार दाखल केली आणि त्यानुसार पनवेल शहर पोलिसांनी अपहरणाचा गुन्हा दाखल करुन पलायन केलेल्या या मुलींचा शोध सुरू केला.

मुंबई व उपनगरातील रेल्वे पोलिसांशी समन्वय साधून या मुलींबाबतची माहिती त्यांना कळवण्यात आली. त्याचप्रमाणे बालगृहातून पळालेल्या मुलींच्या नातेवाइकांकडेही चौकशी सुरू करण्यात आली. पोलिसांनी इतर तपास यंत्रणांसोबत केलेल्या समन्वयामुळे अखेर चार मुली सुखरूप स्थितीत पोलिसांना सापडल्या असून यातील एक मुलगी उरण येथील चिरनेर येथे तिच्या गावी आजीकडे गेल्याचे समजले. दुसरी मुलगी मुंबई येथील बांद्रा येथे रेल्वे पोलिसांना सापडली. तिच्यासोबत कोण नसल्याने रेल्वे पोलिसांनी या मुलीला डोंगरी येथील बालगृहात ठेवलं आहे. तिसरी मुलगी सातारा जिह्यातील तिच्या मूळ गावी आईकडे गेल्याचं पोलिसांना समजलं. या मुलीलाही जवळच्या बालगृहात ठेवण्यात आलं असून चौथी मुलगी तळोजा भागात सापडल्याची माहिती पनवेल शहर पोलीस ठाण्याचे वरिष्ठ पोलीस निरीक्षक नितीन ठाकरे यांच्याकडून देण्यात आली आहे.