याबाबतची सविस्तर माहिती अशी की, मूळचे कर्नाटकातील इंडी परिसरातील असलेलं गंगनमल्ली कुटुंब मोलमजुरीसाठी अनेक वर्षांपूर्वी साताऱ्यातील कराड तालुक्यातील वाठार इथं येऊन स्थायिक झाले आहे. याच कुटुंबातील लक्ष्मण औदाप्पा गंगनमल्ली (वय २५) याचा बुधवारी रात्री दुर्गादेवी विसर्जनावेळी नदीत बुडून मृत्यू झाला. तो बांधकाम व्यावसायिकाच्या बेळगावमधील साईटवर सध्या नोकरीला होता.

लक्ष्मण औदाप्पा गंगनमल्ली हा दुर्गा उत्सवासाठी दोन दिवस सुट्टीवर वाठार या गावी आला होता. मालखेड गावातील कृष्णा नदीपात्रात दुर्गादेवीचे विसर्जन करण्यासाठी मंडळाचे तरूण गेले होते. त्यावेळी लक्ष्मण हाही नदीच्या पाण्यात उतरला. परंतु पाण्याचा अंदाज न आल्याने पाण्याच्या वेगवान प्रवाहात काही अंतर वाहत जाऊन तो बुडाला. या घटनेची माहिती मिळताच कराड ग्रामीण पोलीस ठाण्याचे वरिष्ठ पोलीस निरीक्षक महेंद्र जगताप यांनी पोलीस कर्मचाऱ्यांच्यासह घटनास्थळी धाव घेतली. तसंच पोलिसांनी स्थानिक मच्छीमारांना बोलावून शोध मोहीम राबवली.

मच्छिमारांनी गळाच्या साह्याने लक्ष्मण गंगनमल्ली याचा मृतदेह पाण्यातून वर काढला आणि रात्री दोन वाजता शोध मोहीम संपली. त्यानंतर पंचनामा करून मृतदेह उत्तरीय तपासणीसाठी कराडच्या उपजिल्हा रुग्णालयात पाठवण्यात आला होता. या घटनेची नोंद कराड ग्रामीण पोलीस ठाण्यात करण्यात आली असून पोलीस अधिक तपास करत आहेत.

दरम्यान, कुटुंबातील कमावत्या तरूण मुलाचा बुडून मृत्यू झाल्याने गंगनमल्ली कुटुंबावर दु:खाचा डोंगर कोसळला असून वाठार गावात हळहळ व्यक्त केली जात आहे. या घटनेनं दुर्गादेवी मंडळातील कार्यकर्त्यांवरही शोककळा पसरली आहे.