Pune Crime: पुण्यात आयुष कोमकर हत्या प्रकरणी पोलिसांनी कारवाईचा फास आवळत बंडू आंदेकर आणि त्याच्या साथीदारांवर मकोका लावला आहे. तसंच आंदेकरच्या घरावर छापा टाकून कोट्यवधींचा मुद्देमाल पोलिसांकडून जप्त करण्यात आला आहे.
पुणे: पुण्यातील टोळीयुद्धातून झालेल्या आयुष कोमकर खून प्रकरणाने राज्यभरात खळबळ उडाली. या प्रकरणातल आरोपी बंडू आंदेकर आणि त्याच्या साथीदारांवर मकोका अंतर्गत कारवाई करण्यात आली आहे. तसंच गुन्हे शाखेने आंदेकर यांच्या घरावर छापा टाकून कोट्यवधींचा मुद्देमाल जप्त केला. यात सोने, रोकड, चांदी आणि जमीन व्यवहाराशी संबंधित कागदपत्रांचा समावेश असून पोलिसांनी आंदेकरची मुलगी आणि इतर साथीदारांच्या घरावरही झडती घेतली असून आंदेकरच्या घरात मोठं घबाड पोलिसांच्या हाती लागलं आहे.
मिळालेल्या माहितीनुसार, आयुष कोमकर खून प्रकरणात गुन्हे शाखेने आंदेकर टोळीच्या म्होरक्या सूर्यकांत उर्फ बंडूअण्णा आंदेकर याच्या पुण्यातील घरावर छापा टाकला. या झडतीत 77 तोळे सोन्याचे दागिने, अडीच लाखांची रोकड, चांदी, मोटार, तसेच जमीन व्यवहाराशी संबंधित करारनामे, कर पावत्या व बँक कागदपत्रे असा कोट्यवधींचा मुद्देमाल जप्त करण्यात आला. आंदेकरची मुलगी वृंदावनी वाडेकर व तिच्या मुलांसह अन्य साथीदारांच्या घरांवरही झडती घेण्यात आली. त्यातून 21 हजारांची रोकड, 16 मोबाइल संच आणि दागिन्यांच्या पावत्या पोलिसांनी जप्त केल्या.
नाना पेठेतील टोळीयुद्ध व कौटुंबिक वादातून अभियांत्रिकी विद्यार्थी आयुष कोमकर याचा खून करण्यात आला होता. या प्रकरणी आंदेकर टोळीचा म्होरक्या सूर्यकांत उर्फ बंडू अण्णा आंदेकर याच्यासह 13 साथीदारांविरुद्ध महाराष्ट्र संघटित गुन्हेगारी नियंत्रण कायद्यान्वये (मकोका) कारवाई करण्याचे आदेश पोलीस आयुक्त अमितेश कुमार यांनी दिले आहेत.
Success Story : फसवणूक झाली पण सातारच्या तरुणानं जिद्द सोडली नाही, व्यवसाय यशस्वी करत रचला इतिहास, करतोय कोट्यवधींची उलाढाल
भावाला घेऊन आला अन्…
आयुष कोमकर हा 5 सप्टेंबरला सायंकाळी लहान भावाला शिकवणीहून घेऊन नाना पेठेतील लक्ष्मी कॉम्प्लेक्समध्ये परतला. दुचाकी पार्क करत असताना आरोपी अमन पठाण आणि यश पाटील यांनी त्याच्यावर पिस्तुलातून गोळीबार केला. यात आयुषचा जागीच मृत्यू झाला. त्याची आई कल्याणी यांनी समर्थ पोलिस ठाण्यात तक्रार दिली. आयुष हा बंडू आंदेकरचा नातू होता. माजी नगरसेवक वनराज आंदेकर यांच्या खुनाचा बदला घेण्यासाठी जावई गणेश कोमकर याचा मुलगा आयुष याची हत्या करण्यात आल्याचा तपासात निष्कर्ष आहे. या प्रकरणी आतापर्यंत आठ जणांना अटक झाली असून, काही आरोपी अजूनही पसार आहेत.
दरम्यान, बंडू आंदेकर , नातू तुषार वाडेकर, स्वराज वाडेकर, मुलगी वृंदावनी वाडेकर, अमन पठाण, सुजल मेरगू, अमित पाटोळे आणि यश पाटील यांना अटक करण्यात आली. तर, कृष्णा आंदेकर, शिवम आंदेकर, लक्ष्मी आंदेकर, अभिषेक आंदेकर फरार आहेत.
लेखकाबद्दलअक्षय शितोळेअक्षय शितोळे | २०१८ पासून डिजिटल मीडियात कार्यरत असून सध्या मटा ऑनलाइनमध्ये प्रिन्सिपल डिजिटल कंटेंट प्रोड्युसर म्हणून जबाबदारी सांभाळत असताना राज्यभरातील रिपोर्टर्ससोबत समन्वय साधण्याचेही काम करत आहे. राजकीय बातम्यांमध्ये विशेष रस, बातम्यांमागची बातमी अर्थात घडामोडींचा विश्लेषणात्मक आढावा घेण्याचा सातत्याने प्रयत्न असतो. शेती आणि ग्रामीण जीवन हे जिव्हाळ्याचे विषय आहेत. यापूर्वी लोकमत, न्यूज १८ लोकमत आणि एबीपी माझा या संस्थांमध्येही कामाचा अनुभव असून मुंबईतील रूईया महाविद्यालयातून पत्रकारितेत पदवी प्राप्त केली आहे.… आणखी वाचा