महामार्गावर गोव्याच्या दिशेने जात असताना इको कार चालक लिंगप्पा कटप्पा पातारे (वय 28रा. निगडी पुणे) हा त्याच्या ताब्यातील इको कार (क्र.एमएच14 केएस0231) घेऊन भोगाव हद्दीत भरधाव वेगाने जात असताना त्याचे गाडीवरील नियंत्रण सुटले. यामुळे भोगाव पुलावरील कठडयावर कारने जोराने धडक दिली आणि कार कलंडून झालेल्या अपघातात 1 ठार तर 5 जखमी झाले. या अपघातात अनिल देविदास कांबळे (वय 55 रा.चहोली ता. हवेली जि. पुणे) यांचा जागीच मृत्यू झाला तर धनराज प्रभाकर मगर (वय 42), विकास शंकर चव्हाण (वय 18), मोहन गोरोबा चव्हाण (वय 42), नागनाथ मल्लिकार्जुन कांबळे (वय 35), वाहनचालक निंगप्पा कंटप्पा पातारे (वय 28) हे सर्व जखमी पुणे जिल्ह्यातील रहिवासी आहेत. यापैकी गंभीर दुखापत झालेल्या तिघांना खेड तालुक्यातील कळंबणी येथील रत्नागिरी उपजिल्हा रुग्णालय येथे उपचार करण्यात आले तर दोन किरकोळ जखमी प्रवाशांवर पोलादपूर ग्रामीण रुग्णालय येथे उपचार करण्यात आले.

या अपघाताचे वृत्त समजताच पोलादपूर पोलीस ठाण्याचे सहाय्यक फौजदार रवींद्र सर्णेकर, ठाणे अंमलदार सतीश कदम, पो. ह. नितेश कोंढाळकर यांनी तातडीने घटनास्थळी पोहोचून जखमींना तातडीने उपचारासाठी पाठविले. यासह कशेडी पोलीस मदत केंद्राचे पीएसआय गीमवणेकर, हेकॉ. माजलकर, चाटे व सोडमीस यांनीही घटनास्थळी पोहोचून वाहतूक सुरळीत केली. पोलादपूर पोलीस ठाण्यात या अपघाताची नोंद रजि. 512025 भा.न्या.स. कलम 106(1),281,125(अ),125(ब) मोटार वाहन कायदा कलम 148 प्रमाणे नोंद करण्यात आली असून या अपघातप्रकरणी अधिक तपास ठाणे अंमलदार सतीश कदम हे वरिष्ठांच्या मार्गदर्शनाखाली करीत आहेत.